Të shtëna në një shkollë në Filipine, tre të vdekur dhe tetë të plagosur

 

Ngjarja ndodhi të premten pasdite në Shkollën e Mesme Kombëtare Banga. Sipas kryebashkiakut të Bangës, Albert Palencia, dy prej viktimave ishin nxënës 14-vjeçarë, ndërsa personi i dyshuar për të shtënat ishte 16 vjeç dhe ndodhet gjithashtu mes viktimave.

 

Katër prej të plagosurve raportohet se janë në gjendje kritike.

 

Sipas kryebashkiakut, 16-vjeçari kishte paralajmëruar disa miq gjatë drekës se pas pushimit do të zbatonte një plan, por ata nuk e kishin marrë seriozisht, pasi e njihnin si një person që bënte shpesh shaka.

 

Pas drekës, ai hapi zjarr ndaj nxënësve dhe më pas i dha fund jetës. Pas incidentit, mësimi u pezullua në të gjitha nivelet në komunën e Bangës.

 

Kryqi i Kuq i Filipineve bëri me dije se ishte njoftuar për ngjarjen rreth orës 14:00 dhe dërgoi në vendngjarje një ambulancë me katër ndihmës mjekësorë.

 

Ndërkohë, policia ka nisur hetimet për të zbardhur rrethanat e ngjarjes dhe motivin e të shtënave.

 

Kjo është ngjarja e tretë me të shtëna vdekjeprurëse në një shkollë në Filipine që nga qershori. Në qershor, tre nxënës u vranë në një shkollë në Filipinet qendrore, ndërsa në gusht një nxënës qëlloi për vdekje një bashkëmoshatar.