Mickoski në ShBA: Në fokus integrimi evropian, partneriteti me ShBA-në

 

“Ne ndërtojmë dhe zhvillohemi. Maqedonia për më shumë se dy dekada, për shkak të disa arsyeve artificiale, nuk ka arritur të bëhet pjesë e BE-së, pavarësisht të gjitha lëshimeve që ka bërë, ndryshimit të flamurit, Kushtetutës dhe emrit kushtetues. Negociatat me BE-në duhet të shërbejnë për reformimin e institucioneve dhe jo për ndryshimin e identitetit maqedonas apo zgjidhjen e kërkesave bilaterale. Ndërkohë, ne e kemi harmonizuar plotësisht politikën tonë të përbashkët të jashtme dhe të sigurisë me Bashkimin Evropian. Legjislacioni ynë është pak a shumë i harmonizuar me atë të Bashkimit Evropian. Ne, jo vetëm që presim, por punojmë për zhvillimin tonë.”, - theksoi kryeministri, Hristijan Mickoski.

 

 

Kryetari i opozitës, Venko Filipçe, akuzon se Hristijan Mickoski dhe delegacioni qeveritar qëndrojnë në ShBA, ndërsa opinioni publik nuk ka parë asnjë takim konkret, marrëveshje apo rezultat për Maqedoninë. Ai theksoi se Mickoski po përpiqet ta arsyetojë ekskursionin në ShBA me gjoja mbrojtjen e interesave kombëtare dhe identitetit maqedonas.

 

“Hristijan Mickoski thotë se i ka mbrojtur interesat kombëtare dhe identitetin, një deklaratë e tillë është e tij. Do ta citoj presidenten Siljanovska Davkova: “Marrëveshja e Prespës e konfirmon identitetin maqedonas”, tha presidentja. Çfarë mbron Mickoski kur presidentja thotë se identiteti është konfirmuar me Marrëveshjen e Prespës? E vërteta është e thjeshtë, ai përsëri gënjen, ashtu siç ka gënjyer me vite se do ta kthente emrin, se do ta anulonte Marrëveshjen e Prespës ose se do ta anulonte apo rinegocionte Marrëveshjen me Bullgarinë.”, - deklaroi kryetari i LSDM-së, Venko Filipçe.

 

Gjatë qëndrimit të tij në ShBA, Mickoski ka folur edhe për thellimin e bashkëpunimit me ShBA-në, veçanërisht në energjetikë dhe industrinë ushtarake. Në fokus ishin edhe projektet infrastrukturore, përfshirë gazsjellësit me Greqinë dhe Serbinë, naftësjellësin Selanik–Shkup dhe Korridoret 8 dhe 10.