Aksioni policor në Shkup, Tetovë e Gjevgjeli, sekuestrohen mbi 100 mijë euro, barna e suplemente

 

“Në kuadër të aktiviteteve kriminale, përmes dhënies së ryshfetit zyrtarit doganor, anëtarëve të grupit u është mundësuar kalimi i papenguar i mallrave akcisore përmes vijës doganore pa deklarim dhe pa pagesën e detyrimeve ligjore, si dhe futja e paligjshme e barnave dhe suplementeve të destinuara për shitje. Me një pjesë të veprimeve të konstatuara është shkaktuar dëm material ndaj buxhetit të shtetit, përkatësisht janë shmangur detyrimet doganore, akciza dhe TVSh-ja në shumë të konsiderueshme.”, njofton MPB. 

 

Prokuroria bën të ditur se dy nga të dyshuarit kanë importuar, magazinuar dhe ofruar për shitje pa autorizim barna dhe produkte për përmirësimin e aktivitetit seksual. Gjatë kontrolleve janë gjetur preparate për diabetin, sëmundjet e zemrës dhe sistemit kardiovaskular, sëmundje neurologjike e psikiatrike, reumatologjike dhe autoimune, antibiotikë, kortikosteroide, hormone, insulinë, antikoagulantë dhe benzodiazepinë. Hetimet kanë nisur pas analizës së të dhënave nga telefoni i të dyshuarit të parë, i cili ishte sekuestruar gjatë një kontrolli në janar, kur në banesën e tij ishin gjetur edhe sasi të mëdha cigaresh dhe para. 

 

“Ekziston dyshimi i bazuar se i dyshuari i parë i ka premtuar mjete financiare zyrtarit doganor që të mos kryejë kontroll doganor të një automjeti në të cilin transportoheshin cigare. Zyrtari doganor e ka pranuar premtimin dhe e ka lënë automjetin të kalojë pa kontroll, ndërsa në dorëzimin e parave ka ndërmjetësuar i dyshuari i gjashtë, shtetas turk.”, njofton Prokuroria. 

 

Në aksionin policor të 21 shtatorit nga policia në Shkup, Tetovë dhe Gjevgjeli, në dy kasaforta metalike të fshehura në tavanin e varur të banesës së të dyshuarit të parë, janë gjetur 86.200 euro dhe 16 pllaka me ngjyrë ari. Në automjetin e tij janë gjetur edhe 6.465 euro dhe 62 mijë denarë. Me paratë e gjetura gjatë kontrollit në janar, vetëm te i dyshuari i parë janë sekuestruar shuma të konsiderueshme në valuta të ndryshme, përfshirë 30 mijë dollarë kanadezë, 35 mijë dollarë australianë, 12.950 euro dhe 69 mijë denarë. Tetë personat dyshohen për disa vepra penale, përfshirë kontrabandë, shmangie të pagesës së akcizës, fshehje të mallrave të kontrabanduara, mashtrim doganor, dhënie dhe marrje ryshfeti, prodhim dhe nxjerrje në qarkullim të mjeteve të dëmshme për trajtim, si dhe pastrim parash.