Botë
Macron kritikon Izraelin në OKB, Netanyahu reagon ashpër
23.09.2026 10:25
Komentet e Presidentit të Francës, Emmanuel Macron, në Asamblenë e Përgjithshme të Kombeve të Bashkuara kanë shkaktuar reagim të fortë nga qeveria izraelite
Komentet e Presidentit të Francës, Emmanuel Macron, në Asamblenë e Përgjithshme të Kombeve të Bashkuara kanë shkaktuar reagim të fortë nga qeveria izraelite, veçanërisht për qëndrimet e tij lidhur me situatën në Gaza dhe Bregun Perëndimor.
Në fjalimin e tij, Macron kritikoi veprimet izraelite në Bregun Perëndimor, duke u ndalur veçanërisht te dhuna e kolonëve. Ai argumentoi gjithashtu se Hamasi nuk ka prani aktive në këtë territor, i cili administrohet nga Autoriteti Palestinez.
Zyra e kryeministrit izraelit, Benjamin Netanyahu, reagoi ashpër ndaj deklaratave të presidentit francez, duke i cilësuar ato si “absurditet të çuditshëm” dhe duke e akuzuar Macronin për “injorancë”.
“Absurditeti i çuditshëm i deklaratës së Emmanuel Macron është i paimagjinueshëm”, thuhej në deklaratën e zyrës së Netanyahut, e cila shtonte se “injoranca nuk është justifikim”.
Reagimi izraelit erdhi disa orë përpara fjalimit të planifikuar të Benjamin Netanyahut në Asamblenë e Përgjithshme të OKB-së, ku kryeministri pritet të paraqesë qëndrimin e qeverisë së tij për zhvillimet në Lindjen e Mesme.