Të premten Von der Leyen në Shkup, Mickoski: Në tavolinë, zgjerimi dhe sfidat aktuale

 

“Do të bisedojmë rreth gjendjeve aktuale në suaza të procesit të zgjerimit, sfidat që ndodhën ndërkohë, sfidat që i presim në periudhën që vjen. E dini, kur bëni plan e strategji se çfarë politike do të udhëhiqni, duhet të keni parasysh ndodhitë në fqinjësi, fqinjësi e më gjerë, që është BE-ja.”, - deklaroi kryeministri, Hristijan Mickoski.

 

 

Në raport me Bullgarinë, Mickoski thotë se nuk ka komunikim personal, ndërkaq u ndal edhe tek ideja për ndërmjetësues në mosmarrëveshjet me Bullgarinë. E vlerëson  të ketë një mediator nga ana e BE-së, në mënyrë që kjo e fundit t’i dëgjojë argumentet e palëve.

 

“Është e logjikshme të bisedohet në prani të përfaqësuesve të BE-së, sepse duhet të dëgjohen argumentet në mënyrë objektive. Kështu, kur ulemi edhe ne dhe bisedojmë në baza bilaterale, si t’ua them: ajo që bisedohet nuk ka në thelb asgjë.  Vlerësoj se për të pasur ndonjë efekt, mirë është të ketë përfaqësues  nga ana e Komisionit Evropian, BE-ja, që t’i dëgjojnë argumentet. Nëse argumentet tona nuk mbajnë, atëherë ne jemi të gatshëm që t’i pranojmë argumentet tjera, por t’i dëgjomë argumentet… Jemi të gatshëm të ulemi e gjejmë mënyrë të tillë që është e nevojshme… Për ne ajo është diçka që paraqet konstancë dhe nuk ka ndryshim në qëndrim.”, - theksoi kryeministri, Hristijan Mickoski.

 

 

Sa i përket reformave, Mickoski shtoi se Qeveria ka strategji e plan të qartë dhe punon në të, ndërkaq një pjesë tjetër e integrimit, sipas tij, nuk varet nga faktorët vendor.