Italia dhe Bosnja e Hercegovina e “nderuan” Turqinë dhe Rumaninë me gola

 

Kombëtarja italiane e futbollit, e cila po përballet me një krizë, regjistroi një fitore që i dha moral. Pas humbjes 0:2 ndaj Belgjikës në hapjen e Ligës së Kombeve, Azzurrët, nën drejtimin e trajnerit Roberto Mancini, i cili u rikthye në pankinë, fituan në Turqi me rezultatin bindës 1:4.

 

Italia kishte epërsinë 3:0 që pas gjysmë ore lojë. Një krosim i ulët nga këndi arriti te Alessandro Bastoni, i cili shënoi nga afër në minutën e nëntë. Turqia nuk po arrinte në asnjë mënyrë të përballonte stilin vertikal të lojës së italianëve. Davide Frattesi përfitoi nga një top i devijuar dhe e çoi rezultatin në 2:0 në minutën e 22-të, ndërsa më pas Michael Kayode (27’) e rriti epërsinë në 3:0, në paraqitjen e tij të parë me kombëtaren.

 

Pavarësisht epërsisë prej tre golash, mbrojtja italiane tregoi disa dobësi. Baris Yilmaz përfitoi nga një moment çorganizimi dhe ngushtoi diferencën në minutën e 47-të, por vendasit i shuan menjëherë shpresat e tyre të pakta për përmbysje. Një pasim i gabuar i portierit Altay Bayindir nisi një aksion në minutën e 50-të, të cilin Pio Esposito e përfundoi me një goditje me kokë në rënie, për rezultatin përfundimtar 1:4.

 

Ndeshja mes fqinjëve, Belgjikës dhe Francës, u vendos në fundin e takimit. Michael Olise i siguroi skuadrës së Zinedine Zidane fitoren 1:0 në transfertë, duke shënuar në minutën e 88-të. Pas dy xhirove, Franca ka pikët maksimale, gjashtë, ndërsa Belgjika dhe Italia kanë nga tre pikë. Turqia është e fundit pa pikë. Në xhiron e tretë, më 2 tetor, Franca do të presë Italinë, ndërsa Belgjika do të jetë nikoqire e Turqisë.

 

Bosnja dhe Hercegovina zhvilloi një ndeshje të shkëlqyer në Bukuresht dhe mposhti Rumaninë 4:2. Mysafirët e nisën shumë mirë ndeshjen dhe që në minutën e 12-të kaluan në epërsi me golin e Armin Gigoviqit. Vetëm shtatë minuta më vonë, Tarik Muharemoviq shënoi për 2:0 dhe e vështirësoi edhe më shumë situatën për kombëtaren vendase. Rumania u rikthye në ndeshje në minutën e 28-të përmes Dani Birligeas, por Bosnja dhe Hercegovina nuk lejoi rikthimin e plotë. Haris Tabakoviq shënoi në minutën e 40-të për 3:1 dhe ua riktheu mysafirëve epërsinë prej dy golash para pushimit.

 

Bosnja dhe Hercegovina vazhdoi me të njëjtin ritëm edhe pas pushimit. Ermin Mahmiq shënoi golin e katërt të mysafirëve në minutën e 55-të. Alex Cicaldau, shtatë minuta më vonë, ngushtoi rezultatin në 4:2, por Rumania nuk arriti deri në fund ta komplikojë më tej ndeshjen. Kështu, pas barazimit 0:0 me Poloninë në ndeshjen e parë, Bosnja dhe Hercegovina regjistroi fitoren e parë në edicionin e ri të Ligës së Kombeve.

 

Në ndeshjen tjetër të këtij grupi, Suedia mposhti Poloninë 3:1 në Solna. Vendasit kaluan në epërsi me golin e Benjamin Nygren në minutën e tetë, ndërsa Sebastian Szymański barazoi në minutën e 43-të. Yasin Ayari (63’) dhe Viktor Gyökeres (72’) siguruan fitoren e skuadrës suedeze. Pas dy xhirove, Suedia kryeson grupin me gjashtë pikë të plota, ndërsa Bosnja dhe Hercegovina ka katër pikë. Polonia ka grumbulluar një pikë, ndërsa Rumania vazhdon të jetë pa pikë. Në xhiron e tretë, më 2 tetor, Suedia do të luajë në transfertë ndaj Bosnjës, ndërsa Polonia do të presë Rumaninë.

 

Në Grupin 2 të Ligës B të Kombeve, Irlanda e Veriut dhe Hungaria barazuan 0:0 në Belfast. Më herët gjatë ditës, në të njëjtin grup, edhe Gjeorgjia barazoi 0:0 me Ukrainën në Tbilisi. Irlanda e Veriut dhe Ukraina kanë nga katër pikë, ndërsa Hungaria dhe Gjeorgjia kanë nga një pikë. Në xhiron e ardhshme, Irlanda e Veriut do të luajë në transfertë ndaj Ukrainës, ndërsa Hungaria do të presë Gjeorgjinë.