Shasivari takoi grupin e punës për Kodin Zgjedhor, mungoi LSDM-ja, partitë tjera, shprehën qëndrimet

 

“Qëllimi i takimit të sotëm ishte që të dëgjohen të gjithë pjesëmarrësit në këtë grup pune, që të shprehin edhe njëherë qëndrimet…Më duhet të them se është arritur në sukses i konsiderueshëm për shkak se për pjesën më të madhe të tekstit ka pajtueshmëri. Tani mbetet që këtij procesit t’i japim edhe gjasën e dytë  në të ardhmen  në kuptim që të gjithë pjesëmarrësit të jenë të pranishëm në tryezë dhe të vazhdojë dialogu edhe puna e grupit të punës për çështjet të cilat kanë mbetur hapur.”, - deklaroi ministri i Drejtësisë, Jeton Shasivari.

 

BDI-ja siguroi dhënien e  kontributit, sipas rekomandimeve të OSBE-ODIHR për ndryshime në kodin zgjedhor. Sa i përket organizimit të zgjedhjeve, janë pro idesë për një njësi zgjedhore.

 

“Për ne është e pranueshme një njësi zgjedhore. Është edhe një nga propozimet tona, por kishte propozime të ndryshme dhe  konform metodologjisë që në fillim e patëm vendosur. Nëse nuk ka harmonizim, konsensus, mbeten zgjidhjet ekzistuese, sipas Kodit Zgjedhor në fuqi.”, - theksoi Blerim Bexheti nga Fronti Evropian.

 

Për përfaqësuesit e partive maqedonase, mosprani e LSDM-së me 18 ulëse në Kuvend është jodemokratike, aq më tepër kur LSDM-ja ka dorëzuar mijëra amendamente në Kuvend për këtë çështje. Mes tjerash, shprehën pikat e tyre ku mbeten të njëjtë në qëndrim.

 

“Në raport me votimin e diasporës vlerësojmë se është e drejtë kushtetuese që shteti t’u mundësojë votim çdo shtetasi, pa marrë parasysh vendit ku jeton, dhe, me teknologjinë  e sotme, vlerësojmë se  këtë të drejtë duhet ta shfrytëzojë diaspora, jo vetëm ta shfrytëzojë, por edhe t’i lehtësohet.”, - theksoi deputeti i VMRO-së, Antonio Milloshovski.

 

“Dua që në emër të Lëvizjes “E di” të shpreh shqetësimin e madh të mosardhjes së sërishme të LSDM-së në këtë takim, sepse, pikërisht mungesa e tyre flet për mungesë të kapacitetit demokratik dhe nga sot vlerësoj se  tashmë e vunë në bixhoz edhe shansin e fundit që të argumentojnë dhe kritikojnë  se dikush i ngadalëson procesin reformues.”, - u shpreh Vesna Bendevska nga Lëvizja “E di”.

 

“Për fat të keq shohim se  LSDM-ja nuk është pranishme. Kjo tregon një lloj të papjekurisë politike dhe jo demokracisë… Qëndrimet tona janë të qarta, dy çështje për të cilat angazhohemi: zgjedhjet e ardhme në një njësi zgjedhore dhe shpërndarje lojale të mjeteve për reklamim të paguar politik.”, - theksoi Borisllav Kërmov nga E Majta.

 

Përkujtojmë se më 15 korrik të vitit të kaluar, RMV-ja lëshoi trenin për realizimin e reformës zgjedhore, ndërsa si kërkesë është pjesë e Agjendës së reformave, vonesat e së cilës rrezikojnë fonde të rëndësishme për vendin.