Danimarkë, sulm i madh kibernetik, miliona të dhëna personale në duart e hakerëve

 

“Së bashku me të gjitha autoritetet përkatëse, po punojmë për të përcaktuar përmasat e plota të incidentit. Tashmë kemi ndërmarrë masa lidhur me Regjistrin Qendror të Personave - CPR-në, të cilat synojnë të parandalojnë incidente të ngjashme. Gjithashtu, kam kërkuar që të kryhet një rishikim i plotë i sigurisë së sistemit. I bëj thirrje të gjithë qytetarëve që të jenë të kujdesshëm tani dhe në periudhën e ardhshme dhe të informohen për masat e sigurisë digjitale.”, - deklaroi ministrja e Shkencës, Arsimit dhe Digjitalizimit, Christina Egelund.

 

Pas zbulimit të incidentit, administrata e Regjistrit Qendror të Personave-CPR, ia ka revokuar kompanisë qasjen në sistem dhe e ka raportuar rastin te Agjencia Daneze për Mbrojtjen e të Dhënave. Autoritetet punojnë për të përcaktuar përmasat e plota të shkeljes dhe se si janë përdorur të dhënat e marra. Një kontroll i kryer nga autoritetet ka treguar se qasja e paautorizuar nuk përfshiu emrat dhe adresat e personave që janë të regjistruar me mbrojtje të veçantë të emrit dhe adresës.

 

“Policia ka për detyrë të mbledhë gjurmët dhe provat, dhe kjo është ajo që po bëjmë tani. Bëhet fjalë për gjurmë digjitale, dhe gjurmët digjitale janë të vështira për t’u gjurmuar. Prandaj, gjatë fundjavës kemi ndërmarrë masa të mëdha për ruajtjen e të dhënave që i konsiderojmë me vlerë dhe që na nevojiten për hetimin e mëtejshëm.”, - theksoi ushtruesi i detyrës së shefit të Policisë në NSK, Nicklas Fallesen.

 

Hetimi për sulmin kibernetik vazhdon, ndërsa autoritetet daneze po përpiqen të përcaktojnë se kush qëndron pas qasjes së paautorizuar dhe deri në çfarë mase janë komprometuar të dhënat personale.