Zgjedhja e Presidentes së Kosovës, Begaj e Rama urojnë Presidenten e re të Kosovës

 

“Në çdo sfidë dhe në çdo hap drejt së ardhmes evropiane, Shqipëria dhe Kosova do të jenë bashkë. Urime Presidente! Zoti e bekoftë Kosovën dhe shqiptarët kudo ku janë!”, - theksoi presidenti i Shqipërisë, Bajram Begaj.

 

Kryeministri Edi Rama thotë se zgjedhja e presidentes së re vjen në një kohë sfiduese.

 

“Urime të përzemërta akademikes së mirënjohur, zonjës Justina Shiroka Pula, për zgjedhjen Presidente e Republikës së Kosovës, në një fazë sfiduese për Kosovën dhe në një kohë sfiduese për krejt rajonin tonë e për vetë Evropën.”, - u shpreh kryeministri, Edi Rama.

 

Dëshmi të pjekurisë politike të Kosovës, e quajti ministri i Jashtëm, Ferit Hoxha, votimin për presidenten e re.

 

“Ky zhvillim pozitiv përcjell një mesazh të qartë: interesi i qytetarëve dhe i shtetit qëndron mbi çdo ndarje politike. Dialogu, mirëkuptimi dhe gjetja e gjuhës së përbashkët për çështjet me interes kombëtar janë tregues të pjekurisë demokratike dhe të përgjegjësisë institucionale.”, - deklaroi ministri i Punëve të Jashtme, Ferit Hoxha.  

 

Vlerësime pati edhe nga liderët e opozitës. Kryetari demokrat Sali Berisha e vlerësoi Justina Pulën si akademike e shquar dhe i uroi suksese.

Edhe kreu i PL-së, Ilir Meta, përgëzoi deputetët e Parlamentit që dëshmuan pjekurinë dhe përgjegjshmërinë e lartë politike për kapërcimin e një situate sfiduese për Kosovën.