Stamboll, Samiti Ndërkombëtar i Drejtësisë

 

“Me ftesë të ministrit të Drejtësisë së Republikës së Turqisë, zotëri Akin Gyrlek, marr pjesë në Samitin Ndërkombëtar të Drejtësisë që mbahet në Stamboll. Ky është një forum i rëndësishëm për shkëmbimin e përvojave, forcimin e bashkëpunimit juridik ndërkombëtar dhe avancimin e standardeve të sundimit të ligjit.”, - deklaroi ministri i Drejtësisë, Jeton Shasivari.

 

Shasivari thotë se do ta shfrytëzojë samitin për të ndërtuar partneritete të reja, ndërsa po zhvillon edhe takime bilaterale në margjinat e samitit. Ai është takuar me homologun nga Gjeorgjia, ndërsa pritet të zhvillojë takim edhe me ministrin turk të Drejtësisë dhe kolegë të tjerë nga rajoni dhe bota. 

 

“Si ministër i Drejtësisë, e shoh këtë pjesëmarrje si mundësi për të përfaqësuar interesat tona institucionale dhe për të ndërtuar partneritete të reja në fushën e drejtësisë. Sundimi i ligjit dhe bashkëpunimi ndërkombëtar janë themeli i një drejtësie më të fortë dhe më të besueshme.", - theksoi ministri i Drejtësisë, Jeton Shasivari.

 

Në samit po marrin pjesë rreth 600 pjesëmarrës, përfshirë ministra drejtësie, gjykatës dhe ekspertë nga 70 vende, bashkë me rreth 30 organizata ndërkombëtare.