Ekonomi
Bozhinovska me studentët e Akademisë Diplomatike të Vjenës: Prioritetet energjetike dhe projektet strategjike të Maqedonisë së Veriut
09.10.2026 10:01
Bozhinovska zhvilloi një takim dhe mbajti ligjëratë para studentëve të Akademisë Diplomatike të Vjenës....
Ministrja e Energjetikës, Minierave dhe Burimeve Minerale, Sanja Bozhinovska, në kuadër të vizitës së punës në Vjenë dhe pjesëmarrjes në programin ekzekutiv të trajnimit “Gratë lidere – Evropa Juglindore dhe Deti i Zi/Kaukazi Jugor 2026”, zhvilloi një takim dhe mbajti ligjëratë para studentëve të Akademisë Diplomatike të Vjenës.
Në një diskutim të hapur me diplomatët e ardhshëm, Bozhinovska prezantoi gjendjen dhe prioritetet në sektorin energjetik të Maqedonisë së Veriut, projektet strategjike për diversifikimin e burimeve dhe modernizimin e infrastrukturës, si dhe aktivitetet për forcimin e pavarësisë energjetike dhe sigurisë së furnizimit.
Studentët patën mundësi të parashtronin pyetje dhe të njiheshin drejtpërdrejt me sfidat në hartimin dhe zbatimin e politikave energjetike, si dhe me lidhjen e tyre me zhvillimin ekonomik dhe bashkëpunimin ndërkombëtar.
Në kuadër të programit, ministrja mori pjesë edhe në sesionin “Diplomacia digjitale”, kushtuar përdorimit të mjeteve digjitale në marrëdhëniet diplomatike bashkëkohore dhe komunikimin ndërkombëtar.
Gjatë vizitës në Vjenë, Bozhinovska zhvilloi gjithashtu një takim në Ministrinë Federale për Çështje Evropiane dhe Ndërkombëtare të Austrisë, me qëllim vazhdimin e dialogut institucional dhe avancimin e bashkëpunimit.