Gazë, vazhdojnë sulmet dhe shkatërrimet, Erdogan kërkon llogaridhënie ndërkombëtare

 

“Ku janë? Nuk e di. Në atë moment ishin poshtë. Pyes veten: a ishin në dhomën e gjumit, në kuzhinë apo në sallon? Nuk e di ku ishin. Punonjësit e shpëtimit thonë se ka të ngjarë që shpërthimi i fuqishëm t’i ketë shkatërruar plotësisht trupat. Varret i kam përfunduar. Janë gati. Por, ende janë bosh sepse trupat nuk i kam gjetur.”, - tha një banor i Gazës, Mohammed Hamdi Al-Zaitouna.

 

Pasojat e luftës rëndojnë edhe mbi gazetarët palestinezë. Sipas Sindikatës së Gazetarëve Palestinezë, më shumë se 266 gazetarë janë vrarë që nga fillimi i luftës, ndërsa mbi 370 institucione dhe zyra mediatike janë shkatërruar.

 

“Ne i humbëm shtëpitë tona, ashtu si banorët e tjerë të Gazës. Humbëm pajisjet dhe shumë miq e kolegë. Por, raportimi vazhdoi dhe zëri i Gazës vazhdoi të dëgjohej në mbarë botën. Jetojmë nën presion dhe dëshmojmë skena që njeriu mezi mund t’i përballojë: vdekje, shkatërrime dhe masakra.”, - u shpreh fotoreporteri, Bilall Fouad.

 

Gjatë Samitit Ndërkombëtar të Drejtësisë në Stamboll, presidenti turk Rexhep Taip Erdogan, tha se Turqia nuk do t’i braktisë palestinezët dhe kritikoi bashkësinë ndërkombëtare për mungesën e llogaridhënies.

 

“Gaza është shndërruar në kampin më të madh të përqendrimit në botë nga një rrjet gjenocidal, arrogant, radikal dhe i pangopur për vrasje, i cili e konsideron veten mbi të drejtën ndërkombëtare. Kjo është një sprovë për njerëzimin në mbarë botën. Është një sprovë e sinqeritetit për të gjithë ne. Turqia mund të përballet me vështirësi, nëse është e nevojshme, por nuk do t’ua kthejë shpinën njerëzve që kanë shpresat te ne dhe që i janë nënshtruar padrejtësisë. Askush nuk mund të pretendojë se sistemi ndërkombëtar është i drejtë, për sa kohë që përgjegjësit për gjenocidin në Gazë nuk mbahen përgjegjës para ligjit.”, - theksoi presidenti i Turqisë, Recep Tayyip Erdogan.

 

Ndërsa sulmet vazhdojnë dhe rindërtimi mbetet i bllokuar, civilët palestinezë përballen me pasigurinë e përditshme, kurse kërkesat për mbrojtjen e popullsisë dhe përgjegjësisë për shkeljet e së drejtës ndërkombëtare mbeten në qendër të thirrjeve ndërkombëtare.