SHBA-ja merr naftë ruse, reagon Ukraina, Zelensky: Marrëveshja favorizon Moskën

 

“Kjo është një marrëveshje e madhe. Është një sasi e jashtëzakonshme nafte që po vjen në vendin tonë dhe dua ta falënderoj presidentin Putin. Na duhet naftë për botën”, deklaroi presidenti i SHBA-së, Donald Trump.

 

 Kremlini e konfirmoi marrëveshjen, por nuk zbuloi nëse Uashingtoni kishte bërë lëshime në këmbim të furnizimeve. Kievi reagoi ashpër. Për presidentin ukrainas Volodymyr Zelensky, marrëveshja është e padrejtë dhe e pandershme, pasi vetëm sa do ta ndihmojë Rusinë të vazhdojë luftën.

 

“Rusia do të ‘përgjigjet’ për naftën dizel me terror dhe poshtërsi shtesë. Ajo që nevojitet është një deeskalim i vërtetë me Rusinë, i bazuar në reciprocitet”, u shpreh presidenti i Ukrainës, Volodymyr Zelensky.

 

Ndërsa Uashingtoni dhe Moska diskutojnë për furnizimet me naftë, në Kombet e Bashkuara shtohen thirrjet për ndaljen e luftimeve, mes shqetësimeve për rritjen e viktimave civile dhe përshkallëzimin e konfliktit.

 

“Cikli aktual i përshkallëzimit të sulmeve kundër civilëve duhet të marrë fund tani, përpara se numri i viktimave të arrijë nivele të reja shkatërruese. Diplomacia dhe dialogu duhet të mbizotërojnë dhe t’u jepet një mundësi reale për sukses. Angazhimet e fundit diplomatike duhet të intensifikohen dhe të sjellin rezultate konkrete drejt paqes”, theksoi ndihmës sekretari i përgjithshëm i OKB-së, Khaled Khiari. 

 

Ndërkohë Rusia i hedh poshtë këto akuza, duke i konsideruar të pavërteta.

 

“Ne i hedhim poshtë kategorikisht akuzat e pabazuara se forcat e armatosura ruse sulmojnë qëllimisht civilët ukrainas. Objektivat tona kanë qenë dhe mbeten ekskluzivisht instalimet ushtarake dhe infrastruktura e përfshirë në mbështetjen e operacioneve ushtarake, pavarësisht përpjekjeve të Kievit dhe vendeve evropiane për të pretenduar të kundërtën”, u shpreh ambasadori i Rusisë në OKB, Vasily Nebenzya.

 

Sulmet vazhduan edhe gjatë 24 orëve të fundit, me goditje nga të dyja palët.