Askush nuk u përjashtua: Në fushë mbetën nëntë lojtarë!

 

Në minutën e 63-të, trajneri i Villarrealit vendosi të bëjë një zëvendësim të dyfishtë. Gerard Moreno dhe Georges Mikautadze duhej të largoheshin nga fusha, ndërsa në vend të tyre të hynin Alex Freeman dhe Tani Oluëaseyi. Por më pas ndodhi një zhvillim i papritur. Gjyqtari Siebert vlerësoi se Moreno dhe Mikautadze po vononin qëllimisht daljen nga fusha dhe zbatoi rregullin sipas të cilit lojtarët që hyjnë në lojë duhet të presin të paktën një minutë përpara se t'u lejohet hyrja. Kështu, Villarreali luajti për më shumë se një minutë me vetëm nëntë futbollistë, gjë që shkaktoi habi dhe pakënaqësi në tribunat e stadiumit „La Cerámica“. 

 

Edhe pas përfundimit të minutës së përcaktuar, Freeman dhe Oluëaseyi duhej të prisnin ndërprerjen e parë të lojës për të hyrë në fushë. Gjatë kësaj kohe, Napoli kërcënoi dy herë pranë zonës së rreptësisë së vendasve, por nuk arriti ta shfrytëzonte epërsinë numerike për të shënuar golin e barazimit. Për këtë situatë të pazakontë raportoi gazeta spanjolle „AS“, ndërsa pas ndeshjes reagoi edhe Gerard Moreno, i cili pranoi se nuk ishte në dijeni të vendimit të gjyqtarit. 

 

“Nuk e pashë gjyqtarin dhe as nuk e dëgjova fishkëllimën. Këto janë gjëra nga të cilat duhet të mësojmë, përfshirë edhe unë. Ato pak minuta mund të jenë vendimtare, prandaj herën tjetër do t'i kushtojmë vëmendje kësaj“, deklaroi ai për „Movistar Plus“.