Përballje e re mes Dembélé dhe Yamalit
20.10.2026 13:50
Të martën, në kuadër të xhiros së tretë të Ligës së Kampionëve, na pret një spektakël i vërtetë futbolli...
Të martën, në kuadër të xhiros së tretë të Ligës së Kampionëve, na pret një spektakël i vërtetë futbolli, pasi në “Parkun e Princave”, duke filluar nga ora 21:00, do të përballen kampioni aktual i Evropës, PSG-ja, dhe Barcelona, e cila po kalon një formë të jashtëzakonshme edhe këtë sezon. Gjiganti katalanas mbërrin në Paris në një formë fantastike, me nëntë fitore në po aq xhiro të zhvilluara në kampionatin spanjoll.
Përballja qendrore e mbrëmjes do të jetë dueli mes dy mjeshtërve të futbollit, të cilët diktojnë ritmin e skuadrave të tyre: Ousmane Dembélé dhe Lamine Yamal. Fituesi i Topit të Artë të vitit të kaluar, Dembélé, po kalon një periudhë të shkëlqyer dhe në nëntë paraqitjet e tij për PSG-në këtë sezon ka regjistruar katër gola dhe gjashtë asistime. Nga ana tjetër, Yamal, favoriti kryesor për fitimin e Topit të Artë të këtij viti, ka shifra edhe më mbresëlënëse.
Në 11 ndeshje, ai ka shënuar nëntë gola dhe ka dhënë plot dhjetë asistime. Është interesante se dy yjet kanë ndarë në një periudhë të caktuar të njëjtën dhomë zhveshjeje te Barcelona, por në fushë kanë luajtur së bashku vetëm shtatë minuta, në prill të vitit 2023, katër muaj para se Dembélé të transferohej në Paris, ku përjetoi një rilindje të plotë në karrierën e tij futbollistike.
Edhe pse Dembélé është dhjetë vjet më i vjetër dhe ka fituar dukshëm më shumë trofe në nivel klubesh, bilanci i përballjeve të drejtpërdrejta është në favor të 19-vjeçarit Yamal. Në pesë përballjet e deritanishme mes tyre, dy në nivel klubesh dhe tri me kombëtaret, skuadra e Yamalit ka fituar katër herë, ndërsa Dembélé ka regjistruar vetëm një fitore. Fitoren e vetme, Dembélé e arriti me fanellën e PSG-së, në ndeshjen e kthimit të çerekfinales së Ligës së Kampionëve në sezonin 2023/24. Në atë rast, parisienët, pas humbjes 2-3 në ndeshjen e parë, të luajtur në Paris, triumfuan 4-1 në transfertë ndaj Barcelonës.
Përballjen e fundit e zhvilluan në gjysmëfinalen e Kupës së Botës të këtij viti, kur Spanja e mposhti Francën me rezultatin 2-0 në Dallas. Futbollisti i ri spanjoll shënoi tre gola dhe regjistroi një asistim në këto përballje, ndërsa reprezentuesi francez e gjeti rrugën drejt rrjetës dy herë. Sonte vjen kapitulli i gjashtë i rivalitetit të tyre. Mbetet të shihet nëse PSG-ja, e udhëhequr nga Dembélé me përvojë, do të arrijë ta ndalë Barcelonën e shkëlqyer, apo nëse makineria katalanase do të triumfojë edhe në Paris.