Fillon debati për amendamentet e ribalancimit të Buxhetit

 

Me projeksionin e ri, të ardhurat buxhetore ulen për 5,3 miliardë denarë, në 374,2 miliardë denarë, ndërsa shpenzimet zvogëlohen për të njëjtën shumë, në 420,5 miliardë denarë. Deficiti buxhetor mbetet 46,3 miliardë denarë, përkatësisht 4,1 për qind e Prodhimit të Brendshëm Bruto (PBB).

 

Ministrja e Financave, Gordana Dimitrieska-Koçoska, shpjegoi se ulja e të ardhurave kryesisht vjen si pasojë e pritshmërive më të ulëta nga akcizat, për shkak të uljes së akcizave për benzinën dhe naftën. Janë ulur gjithashtu të ardhurat jotatimore dhe donacionet.

 

Në anën e shpenzimeve parashikohen ndarje më të vogla të mjeteve për mallra dhe shërbime, subvencione dhe projekte kapitale, për shkak të shtyrjes së realizimit të tyre. Njëkohësisht, vazhdon mbështetja për kategoritë e cenueshme sociale, shërbimet shëndetësore dhe komunat.

 

Projeksioni për rritjen ekonomike mbetet 3,5 për qind. Ministrja theksoi se qëllimi i ribalancimit është përshtatja e shpenzimeve me realizimin e buxhetit, mbështetja e kategorive prioritare dhe ruajtja e deficitit të planifikuar buxhetor.