Transformimi i kontratave në vendime, VLEN: Ofron siguri dhe dinjitet për punëtorët

 

“Ky është një problem i trashëguar ndër vite. Detyrimi ynë është të punojmë për zgjidhjen e tij, në vend që t’ua lëmë si barrë gjeneratave të ardhshme të politikanëve. Prandaj, kemi dorëzuar propozimin ligjor që parasheh kalimin në marrëdhënie pune me afat të pacaktuar për personat që i plotësojnë kushtet ligjore në institucionet publike të përfshira nga kjo zgjidhje. Propozimi përfshin kategori të ndryshme të angazhimit: kontrata me afat të caktuar, kontrata në vepër, kontrata autoriale, angazhime përmes agjencive dhe forma të tjera kontraktuale për kryerjen e punës.”, - deklaroi deputeti i VLEN-it, Zekirja Tairi.

 

 

Por, BDI-ja opozitare e sheh si shqetësim këtë propozim-ligj. Ata kanë drojë se ligji do të shfrytëzohet për punësime partiake në institucionet shtetërore. 

 

“Ne e shohim këtë si shqetësim, pasi ekziston rreziku që ky proces të përdoret vetëm për punësime partiake dhe sistemimin e njerëzve të afërt me pushtetin. Shqetësimi ynë është edhe më i madh kur kemi parasysh se, në të njëjtën kohë, shumica parlamentare po krijon mekanizma për ndërprerjen e marrëdhënieve të punës për punonjësit administrativë.”, - theksoi deputetja e BDI-së, Dijana Toska.

 

Propozim-ligji parashikon vendime për punonjësit me kontrata deri në fund të vitit 2027. Nga 1 janari i vitit 2028, angazhimi me kontrata do të kufizohet deri në 10% të numrit të përgjithshëm të të punësuarve në institucionin përkatës.