Zverev merr kreun e renditjes ATP
30.10.2026 10:57
Tenisti gjerman Alexander Zverev, nga e hëna e ardhshme, do të bëhet lojtari i 30-të në histori që ngjitet në vendin e parë të renditjes ATP...
Tenisti gjerman Alexander Zverev, nga e hëna e ardhshme, do të bëhet lojtari i 30-të në histori që ngjitet në vendin e parë të renditjes ATP. Zverev siguroi kreun e renditjes së re pasi u kualifikua në çerekfinale të turneut ATP 500 në Vjenë, ku të enjten, në raundin e dytë, mposhti holandezin Tallon Griekspoor me rezultatin 6:4, 7:5.
“Ky është një moment shumë i veçantë. Ndjesia kur je në majë të botës është e pabesueshme. Është ndryshe nga fitimi i një turneu apo titulli, por është një ndjenjë e mrekullueshme të dish se emri yt do të shoqërohet me numrin në renditjen e re”, deklaroi Zverev.
Ai bëhet gjermani i parë që arrin majën e tenisit botëror që nga Boris Becker në vitin 1991. Në moshën 29-vjeçare e gjashtë muaj, Zverev do të bëhet tenisti i dytë më i moshuar që arrin për herë të parë në karrierë vendin e parë në botë. Më i moshuar se ai ishte vetëm australiani John Newcombe, i cili ishte 30 vjeç kur u ngjit në krye në vitin 1974, një vit pas krijimit të renditjes ATP. Në vendin e parë, Zverev do të zëvendësojë italianin Jannik Sinner, i cili e mban këtë pozicion që nga prilli i këtij viti.
Gjermani arriti në majën e tenisit botëror kryesisht falë rezultateve të shkëlqyera në turnetë Grand Slam këtë sezon. Ai fitoi dy titujt e parë madhorë në karrierën e tij në Roland Garros dhe US Open, ndërsa në Wimbledon luajti në finale dhe në Australian Open arriti deri në gjysmëfinale.