Komedi në futbollin maqedonas: Një ndeshje nuk u përfundua për shkak të mungesës së topit, në tjetrën u errësua, ndërsa në të tretën koncesionari parkoi veturën në fushë

 

Në ndeshjen e Ligës së Tretë – Rajoni 1, Marino ishte nikoqir i Përparimit nga Nikishtani. Takimi ishte paraparë të zhvillohej të dielën në orën 14:30, por filloi me rreth 40 minuta vonesë për shkak të një situate bizare. Mysafirët nga Nikishtani kishin udhëtuar drejt Marinos pa librezat sportive dhe vërtetimet e kontrolleve mjekësore të futbollistëve.

 

Pasi arritën t'i siguronin dokumentet e nevojshme, ndeshja filloi, por nuk u zhvillua deri në fund, pasi fusha nuk kishte ndriçim dhe ndërkohë kishte rënë errësira. Takimi përfundoi në minutën e 75-të, raportoi portali „Kajgana.mk“, duke iu referuar procesverbalit të ndeshjes.

 

„Për shkak se ekipi mysafir nuk paraqiti librezat sportive dhe kontrollet mjekësore para fillimit të ndeshjes, takimi filloi me 40 minuta vonesë. Në minutën e 77-të, për shkak të kushteve të këqija për lojë (errësirës), u dha fundi i ndeshjes“, thuhet në shpjegimin zyrtar.

 

Situatë po aq bizare ndodhi edhe në Shishevo, ku në një ndeshje të Ligës së Katërt, skuadra vendase priti Olimpikun. Këtu ndeshja filloi në kohë, por u ndërpre në minutën e 43-të, pak para përfundimit të pjesës së parë.

Arsyeja ishte se njëri nga futbollistët e kishte larguar topin përtej rrethojës së fushës, ndërsa nuk kishte një top tjetër rezervë me të cilin mund të vazhdonte ndeshja.

 

„Në rezultatin 0:2, një lojtar i skuadrës mbrojtëse e largon topin përtej rrethojës së fushës, pas së cilës kërkohet një top tjetër për vazhdimin e ndeshjes. Vendasit nuk e sigurojnë atë, me arsyetimin se po e pompojnë. Në atë moment, një futbollist i skuadrës vendase, dukshëm i revoltuar për shkak të mungesës së topit, largohet nga fusha, ndërsa pas tij dalin edhe futbollistët e tjerë të ekipit vendas. Pas pritjes prej 15 minutash, ndeshja u ndërpre, pasi lojtarët nuk u kthyen në fushë. Takimi përfundoi në minutën e 43-të“, ka shënuar delegati në procesverbal, sipas „Kajgana.mk“.

 

Kontradiktat në futbollin maqedonas nuk përfunduan këtu në fundjavën që e lamë pas. Përveç ngjarjeve në Marino dhe Shishevo, një skenë e pazakontë ndodhi edhe në lagjen Karposh, në stadiumin e njohur si stadiumi i Lokomotivës. Në këtë fushë ishte paraparë të zhvilloheshin ndeshjet ndërmjet kategorive të reja të FC Karev dhe FC Fortuna, për gjeneratat e lindura në vitet 2012 dhe 2013. Por, në vend të futbollit dhe gëzimit të fëmijëve, të pranishmit u përballën me një situatë të pabesueshme.

 

Ndeshjet nuk u zhvilluan pasi koncesionari i stadiumit, në shenjë të mbrojtjes së të drejtave të tij, e kishte parkuar veturën drejtpërdrejt në fushën e futbollit, duke pamundësuar zhvillimin e takimeve, ndonëse të dyja skuadrat kishin mbërritur dhe ishin të gatshme për të luajtur.