Oklahoma City tërheq fanellën e Westbrook

 

Basketbollisti 37-vjeçar njoftoi tërheqjen nga sporti në muajin gusht, pas 18 sezonesh në NBA. Westbrook largohet si një prej lojtarëve më të veçantë në historinë e ligës, duke mbajtur rekordin për numrin më të madh të ‘triple-double’, me 209 të tilla. Ai u bë një ikonë e Oklahoma City, ku luajti për 11 sezone, nga viti 2008 deri në vitin 2019. Në vitin 2017 fitoi çmimin MVP të NBA-së, ndërsa udhëhoqi Thunder në fazën play-off në nëntë sezone, duke arritur katër herë në finalet e Konferencës së Perëndimit dhe një herë në finalen e madhe, në vitin 2012, ku Oklahoma u mposht nga Miami Heat. 

 

“Jemi jashtëzakonisht krenarë që tërheqim fanellën e Russell. Ai ka lënë gjurmë të pashlyeshme në qytet dhe në shtet gjatë periudhës së tij me skuadrën, ndërsa përkushtimi ndaj komunitetit ka vazhduar edhe më pas”, deklaroi presidenti i klubit, Clayton Bennett. 

 

Sezoni 2016-2017 ishte kulmi i karrierës së Ëestbrook. Ai regjistroi mesatare prej 31.6 pikësh, 10.7 reboundesh dhe 10.4 asistimesh për ndeshje, duke realizuar 42 ‘triple-double’, një rekord për atë sezon, që i siguroi edhe çmimin MVP.

 

Westbrook, i cili u zgjodh me numrin e katërt në draftin e vitit 2008, ka luajtur gjithashtu për skuadra si Houston, Washington, Los Angeles Lakers, Clippers, Denver dhe Sacramento. Megjithatë, Oklahoma City mbetet vendi ku ai shkroi historinë e tij më të madhe. Me 821 ndeshje, 18.859 pikë, 5.760 ‘rebound’ dhe 6.897 asistime, Ëestbrook mban rekordet e klubit në të gjitha këto kategori statistikore.