Komisionet parlamentare diskutojnë ndryshimet në ligjet për mediat dhe sigurimin pensional

 

Në rend dite të Komisionit për Transport, Transformim Digjital, Mjedis Jetësor dhe Planifikim Hapësinor janë ndryshimet e Ligjit për Shërbime Mediatike Audio dhe Audiovizuele, në lexim të dytë. Për propozim-ligjin është dorëzuar një amendament nga deputeti i LSDM-së, Oliver Spasovski.

 

Me ndryshimet propozohet një model i ri për financimin e veprimtarisë radiodifuzive, me qëllim sigurimin e një stabiliteti dhe parashikueshmërie më të madhe financiare. Parashihet që shuma e mjeteve të përcaktohet për një periudhë pesëvjeçare, ndërsa financimi të sigurohet nga Buxheti i shtetit, në vlerë prej një për qind të të ardhurave tatimore të realizuara, bazuar në llogarinë përfundimtare të miratuar së fundmi.

 

Pas përfundimit të çdo periudhe pesëvjeçare, shuma e mjeteve do të rishqyrtohet dhe do të përcaktohet sërish për ciklin e ardhshëm pesëvjeçar.

 

Ndërkohë, Komisioni për Politikë Sociale, Demografi dhe Rini do të diskutojë ndryshimet e ligjeve për sigurimin e detyrueshëm dhe vullnetar pensional me financim kapital, si dhe ndryshimet e Ligjit për Familjen. Të tria propozim-ligjet janë në lexim të parë.

 

Seancë do të mbajë edhe Komisioni Ligjvënës-Juridik, i cili do të shqyrtojë disa propozim-ligje, përfshirë ndryshimet e ligjeve për sigurimin pensional, familjen, bujqësinë dhe zhvillimin rural, Fondin për Sigurimin e Depozitave, si dhe propozim-ligjin për shfuqizimin e Ligjit për Koordinimin e Bashkësisë së Sigurisë dhe Inteligjencës.