Pakoja e zgjerimit te BE-së, 2026, Kos: Ndryshimet kushtetuese mbeten kyçe për RMV-në

 

“Maqedonia e Veriut duhet të përmbushë zotimin e saj për të përfunduar ndryshimet kushtetuese, siç përcaktohet në konkluzat e Këshillit të korrikut të vitit 2022. Komisioni do të vazhdojë ta mbështesë Maqedoninë e Veriut në rrugën e saj drejt BE-së. Objektivi ynë mbetet hapja e klasterit të parë sapo të plotësohen kushtet. Tani gjithçka varet nga Maqedonia e Veriut.”, - deklaroi eurokomisionerja për Zgjerim, Marta Kos.

 

 

Raportuesi për RMV-në në PE, Tomas Vaic, me thirrje ndaj dy qeverive, të Shkupit dhe Sofjes, që të ulen e të bisedojnë, dhe, të gjejnë zgjidhje për tejkalimin e ngërçit dypalësh. 

 

“Mënyra e vetme për të dalë nga kjo situatë e bllokuar është që të bisedohet mes veti, pra Qeveria bullgare dhe Qeveria e Maqedonisë së Veriut të ulen dhe të bisedojnë. Siç e dimë, motivimi nuk është gjithmonë në nivelin e lartë. Ju bëj thirrje juve komisionere, që të investoni në këtë përpjekje diplomatike.”, - theksoi raportuesi për RMV-në në PE, Tomas Vaic.

 

Reformat në gjyqësor, lufta kundër korrupsionit dhe forcimi i institucioneve demokratike mbeten kushtet tjera ku duhet të shënohet progres. Nevojiten përpjekje të mëtejshme për të forcuar sundimin e ligjit.

 

“Maqedonia e Veriut ndodhet në një nivel përgatitjeje ndërmjet atij të pjesshëm dhe atij të moderuar dhe nuk ka shënuar përparim në parandalimin dhe luftimin e korrupsionit. Korrupsioni mbetet i përhapur dhe përbën një çështje serioze shqetësimi. Ndryshimet e janarit 2026 në Kodin Penal, që kanë të bëjnë me veprat penale të keqpërdorimit të pozitës zyrtare dhe bashkimit kriminal, nuk i adresojnë në mënyrë të duhur pasojat negative të ndryshimeve të vitit 2023 dhe kanë kontribuar në pasigurinë juridike. Komisioni Shtetëror për Parandalimin e Korrupsionit duhet të intensifikojë identifikimin proaktiv të rasteve të mundshme të keqpërdorimeve.”, thuhet në raportin e progresit për RMV-në.

 

 

Në raportin e progresit është përmendur edhe kërkesa studentore për mbajtjen e provimit të jurisprudencës në shqip. 

 

 

Në kuadër të pakos së zgjerimit u publikuan edhe udhërrëfyesit për Shqipërinë, Malin e Zi, Moldavinë dhe Ukrainën, që përcaktojnë hapat e ardhshëm drejt anëtarësimit në Union, përmes vazhdimit të reformave dhe përfshirjes graduale të vendeve në politikat evropiane.