Banka ALTA, LSDM: Po ushtrohet presion ndaj blerësve

 

 

“Kemi informacione nga sinjalizues brenda Bankës Popullore se po ushtrohet presion ndaj blerësve të caktuar të mundshëm, të cilëve Qeveria u ofron privilegje në të ardhmen. Paralajmërojmë të mos bëhet gabimi i njëjtë sikur me blerësin serb gjatë blerjes fillestare të Bankës Ekonomike - Manastir. Pyesim publikisht: a po ushtron Mickoski presion mbi një bankë të huaj?”, - deklaroi Aleksandar Dimitrieviq nga LSDM.

 

 

LSDM-ja ka akuzuar guvernatorin e Bankës Popullore edhe për caktimin e një nga administratorëve të përkohshëm në Bankën ALTA, i cili, sipas opozitës, ka konflikt interesi. Por, Banka Popullore i hedh poshtë kategorikisht këto akuza. 

 

“Banka Popullore e konsideron tejet të papërgjegjshëm përhapjen e insinuatave të tilla nga subjektet politike, veçanërisht në një kohë kur institucioni po ndërmerr masa konkrete për të mbrojtur interesat e depozituesve dhe klientëve të Bankës ALTA. Përsëritja e qëllimshme e të pavërtetave, të cilat janë hedhur poshtë më parë, si dhe vënia në dyshim e ligjshmërisë së veprimeve të Bankës Kombëtare, nuk i shërbejnë informimit të publikut. Përkundrazi, ato minojnë drejtpërdrejt besimin në sistemin bankar.”, - thanë nga Banka Popullore.

 

 

Ndërkohë, VMRO-DPMNE-ja kërkon që rasti i Bankës ALTA të mos përdoret politikisht. Ata kërkuan debat parlamentar për Bankën ALTA sa më shpejt, ndërsa akuzuan kryetaren e komisionit parlamentar për financa dhe buxhet se po e zvarrit këtë çështje, me qëllim që sa më gjatë të jetë objekt i përplasjeve politike. 

 

“VMRO-DPMNE-ja, me nënshkrimet e 1/3 të anëtarëve të Komisionit për Financa dhe Buxhet, tashmë kërkoi që ajo të mblidhet që sot. Por, duket se qëllimi i opozitës është që sa më gjatë të politizohet kjo çështje, për shkak se e kanë caktuar seancën për të mërkurën e ardhshme.”, - theksoi Dafina Stojanovska nga VMRO-DPMNE.

 

Ndërkohë vazhdojnë masat e përkohshme të Bankës Popullore për klientët e Bankës ALTA. Tërheqja e të hollave është kufizuar në 10.000 denarë në javë, ndërsa janë hapur sportele shtesë për t’i shërbyer të gjithë klientët.