Miratimi i propozim-ligjit për jurisprudencën, VLEN-i e përshëndet, BDI-ja e kritikon zgjidhjen

 

“Pas 35 vitesh pritjeje nga pavarësimi i shtetit dhe 58 vite pritjeje nga Ligji i parë për provimin e jurisprudencës, studentët shqiptarë për herë të parë do të kenë mundësinë që provimin e jurisprudencës ta japin edhe në gjuhën shqipe. Ky është një vendim me rëndësi të veçantë për gjeneratat e juristëve shqiptarë, por edhe një dëshmi se problemet trashëguara dhe të lëna pezull për dekada mund të marrin zgjidhje kur ka vullnet dhe përgjegjësi politike.”, - u shpreh Afan Elezi nga VLEN.

 

Ndërkohë, reagoi nënkryetari i BDI-së, Bujar Osmani, i cili përmes një postimi në Facebook tha se një zgjidhje e tillë për provimin e jurisprudencës nuk përbën realizim të plotë të së drejtës, por kufizim të saj.

 

“Në vend që të garantohet mbajtja e tij në gjuhën shqipe, po diskutohet që pjesa teorike të mbahet në shqip, ndërsa ajo praktike jo. Pra, procesi që duhet të garantojë realizimin e një të drejte, shndërrohet në instrument për kufizimin e saj. Kompromisi i sotëm bëhet precedent për kufizimin e së nesërmes, ndërsa kufizimi gradual në fund paraqitet si standard i ri. Kur ngushtimin e një të drejte e feston si sukses në zbatimin e saj, nuk je duke e mbrojtur atë të drejtë, por duke ndihmuar në përcaktimin e kufijve të saj.”, - deklaroi nënkryetari i BDI-së, Bujar Osmani. 

 

Nga ana tjetër, ministri i Drejtësisë, Jeton Shasivari, ka njoftuar se Qeveria do të kërkojë mendim urgjent nga Komisioni i Venecias lidhur me modelin e ri të provimit të jurisprudencës. Ai bëri të ditur se raportuesit e Komisionit të Venecias do të zhvillojnë takime me institucionet, partitë parlamentare, dekanët e pesë fakulteteve juridike dhe përfaqësuesit e studentëve. Studentët që iniciuan këtë çështje e kundërshtojnë zgjidhjen e propozuar ligjore, sipas së cilës 10 provime do të mbaheshin në shqip dhe dy në maqedonisht, duke kërkuar që provimi i jurisprudencës të zhvillohet tërësisht në gjuhën shqipe.