Damon Hill: Ferrari duhet ta caktojë Hamiltonin si pilot të parë dhe jo Leclercun
11.11.2026 14:38
Ish-kampioni i botës në Formula 1, Damon Hill, deklaroi se Ferrari duhet ta mbështesë Lewis Hamiltonin dhe jo bashkëlojtarin e tij...
Ish-kampioni i botës në Formula 1, Damon Hill, deklaroi se Ferrari duhet ta mbështesë Lewis Hamiltonin dhe jo bashkëlojtarin e tij, Charles Leclerc, nëse dëshiron të ketë shanse për të fituar titullin sezonin e ardhshëm. Mënyra se si Ferrari menaxhon pilotët e tij tërhoqi vëmendjen gjatë garës për Çmimin e Madh të Meksikës, më 1 nëntor. Përplasja mes Hamiltonit dhe Leclercut në kthesën e parë, kur ata zinin përkatësisht vendin e parë dhe të dytë, i kushtoi ekipit italian një fitore të dyfishtë pothuajse të sigurt. Këtë situatë e shfrytëzoi Max Verstappen i Red Bullit, i cili në fund triumfoi në garë.
Hill, kampion i botës në vitin 1996, pas garës në Meksikë shkroi në rrjetet sociale se Ferrari duhet ta caktojë Hamiltonin si pilot të parë për sezonin 2027, duke theksuar se: “Lewis do t'i sjellë sukses Ferrarit nëse merr mbështetje 100 për qind”. Duke qenë i ftuar në edicionin e fundit të emisionit të specializuar për Formula 1 në Sky, Hill shpjegoi qëndrimin e tij.
“Ferrari ka investuar shumë te Lewis, e ka sjellë në ekip dhe ai është një nga emrat më të mëdhenj në këtë sport. Nëse vitin e ardhshëm do të kenë një bolid konkurrues, mund të fitojnë titujt si në konkurrencën e pilotëve, ashtu edhe në atë të konstruktorëve. Megjithatë, nuk e shoh se si mund ta arrijnë këtë nëse dy pilotët e tyre vazhdojnë të sillen si deri më tani, përkatësisht nëse Charles vazhdon të luftojë aq ashpër kundër Lewisit”, deklaroi Hill, raportoi Sky.
Sipas Sky, sezoni i fundit te Mercedes dhe i pari te Ferrari krijuan përshtypjen se karriera e Hamiltonit po shkonte drejt rënies, pasi ai ishte tejkaluar fillimisht nga ish-bashkëlojtari George Russell dhe më pas edhe nga Leclerc. Megjithatë, gjatë këtij viti britaniku është rikthyer në formën e tij të njohur. Deri në fund të sezonit kanë mbetur edhe tri gara, në Las Vegas, Katar dhe Abu Dhabi. Titullin në konkurrencën e pilotëve e fitoi piloti i Mercedesit, Kimi Antonelli, ndërsa ekipi i tij triumfoi në konkurrencën e konstruktorëve.