Shqipëria kryeson Grupin C1 të Ligës së Kombeve dhe shanset e saj për “Euro 2028”

18.11.2026 12:46

Shqipëria ka bërë një hap të rëndësishëm drejt “Euro 2028”, duke përfunduar në vendin e parë në Grupin C1 të Ligës së Kombeve...

Shqipëria ka bërë një hap të rëndësishëm drejt “Euro 2028”, duke përfunduar në vendin e parë në Grupin C1 të Ligës së Kombeve, me 15 pikë nga pesë fitore dhe një humbje, duke siguruar edhe ngjitjen në Ligën B. Ekzistojnë disa detaje të rëndësishme: fitimi i grupit në Ligën e Kombeve i siguron Shqipërisë një rrugë alternative drejt Kampionatit Evropian, në rast se nuk arrin të kualifikohet drejtpërdrejt. Ja se si funksionon kjo.

Çfarë përfiton Shqipëria nga vendi i parë?

Sipas renditjes së UEFA-s, Shqipëria fitoi Grupin C1 me 15 pikë, përpara Bjellorusisë (10), Finlandës (10) dhe San Marinos (0). Kjo do të thotë se Shqipëria është një nga fitueset e grupeve të Ligës C në Ligën e Kombeve 2026/27.

Sipas rregullave të UEFA-s, fituesit e grupeve në Ligat A, B dhe C, të cilët nuk kualifikohen për Kampionatin Evropian dhe nuk sigurojnë një vend në “play-off” përmes kualifikueseve, mund të marrin pjesë në fazën shtesë që do të zhvillohet në mars të vitit 2028. Kështu, Shqipëria ka mundësinë të luftojë për një biletë pikërisht përmes Ligës së Kombeve.

Cila është rruga e parë? Kualifikimi i drejtpërdrejtë

Në dhjetor të vitit 2026 do të hidhet shorti për kualifikueset e Kampionatit Evropian. Do të formohen 12 grupe: gjashtë me nga katër skuadra dhe gjashtë me nga pesë skuadra. Shqipëria do të luajë në njërin prej këtyre grupeve, me ndeshje në shtëpi dhe në transfertë, nga marsi deri në nëntor të vitit 2027.

Rregullorja parashikon që 12 fituesit e grupeve të kualifikohen drejtpërdrejt. Edhe tetë skuadrat më të mira të renditura në vendin e dytë do të sigurojnë një vend të drejtpërdrejtë në Kampionatin Evropian. Nënkampionët e tjerë mund të sigurojnë pjesëmarrjen në “play-off”.

Kjo është rruga që Shqipëria duhet të synojë: vendin e parë ose njërin prej tetë vendeve më të mira të dyta.

Rruga e dytë? “Play-off”-i përmes Ligës së Kombeve

Pikërisht këtu qëndron rëndësia e triumfit në grupin e Ligës së Kombeve. Nëse Shqipëria nuk arrin të kualifikohet drejtpërdrejt dhe nuk siguron një vend në “play-off” përmes renditjes në grupet kualifikuese, mund të shfrytëzojë statusin e fitueses së Grupit C1.

Megjithatë, duhet theksuar se Shqipëria nuk e ka të garantuar automatikisht pjesëmarrjen në “play-off”. UEFA do të përzgjedhë fituesit e grupeve të Ligës së Kombeve sipas renditjes së përgjithshme të këtij kompeticioni, duke filluar nga skuadrat më të renditura në Ligat A, B dhe C.

Shqipëria përfundoi e dyta mes katër fitueseve të grupeve të Ligës C:

Kombëtarja Pikët

  • Mali i Zi 16
  • Shqipëria 15
  • Islanda 14
  • Sllovakia 12