Kriza politike, liderët nuk u takuan as sot, pritet të mblidhen brenda javës

Gjatë takimit pritet të arrihet marrëveshje konkrete për dalje nga kriza politike, apo të thuhet se bisedimet dështojnë.

 

Opozita nuk duket optimiste, siç thonë nga LSDM-ja, për shkak të mosgatishmërisë së kryeministrit Gruevski për të pranuar kompromisin e propozuar.

 

Koha e tërheqjes së kryeministrit Gruevski si dhe çështjet lidhur me ministrin e Brendshëm dhe prokurorin publik mbeten pikat më problematike në këto bisedime për të cilat palët nuk arrijnë dot kompromisin.

 

Në një situatë të tillë, palët nuk kursejnë as akuzat e ndërsjella. Zaev sqaroi mbrëmë se për disa linja të kuqe LSDM-ja nuk lëshon pe. Argumentet janë në anën tonë.

 

 

Më herët, kryeministri Gruveski e akuzoi liderin e opozitës se përmes parashtrimit të kushteve të palogjikshme përpiqet të pengojë arritjen e marrëveshjes.

 

Madje, sipas Gruevskit, Zaevi, duke e zgjatur periudhën e krizës politike, dëshiron të dëmtojë edhe ekonominë e vendit, me qëllim që qytetarët të fillojnë të dëshpërohen nga VMRO-ja.

 

Ndërkohë, lideri i PDSh-së, Menduh Thaçi, ka deklaruar se bisedimet nuk do të kenë sukses nëse liderët nuk merren vesh për emrin.

 

Zvarritja e procesit të arritjes së marrëveshjes sipas burimeve nga bisedimet nuk ka të bëjë me vizitën disa orëshe të ndihmëssekretares amerikane të shtetit, Viktoria Nuland, javën e ardhshme në Shkup.

 

Edhe për LSDM-në është e pranueshme që të pritet. Në rast se arrihet marrëveshje kjo do të nënkuptonte kthimin e opozitës në kuvend, ku do të votohej qeveria e re.

 

Nëse bisedimet dështojnë, nga LSDM kanë paralajmëruar se do të vazhdojnë me publikimin e “bombave”.