Arabi Saudite: mbi 430 të arrestuar për lidhje me IS-in

Autoritetet saudite kanë arrestuar 431 persona, të dyshuar se kanë lidhje me grupin militant Shteti Islamik, duke parandaluar kështu sulme në xhami, mbi forcat e sigurisë dhe në misionet diplomatike.

 

Ministria e Brendshme Saudite, ka thënë sot se autoritetet kanë shpërbërë “një celulë të organizatës, e cila është e lidhur me grupin militant Shteti Islamik”.

 

Shumica e të arrestuarve janë shtetas sauditë.Militantët e Shtetit Islamik kanë marrë përgjegjësinë e sulmit me makinë bomb më 16 korrik, afër burgut të sigurisë së lartë në Arabinë Saudite, ku u vra shoferi dhe u plagosën dy roje të sigurisë.

 

“Gjashtë operacione të njëpasnjëshme vetëvrasëse të cilat kishin shënjestër xhami në provincën lindore, janë parandaluar”, ka thënë ministria.

 

“Planet e terroristëve për të sulmuar misionet diplomatike dhe ndërtesat qeveritare në provincën Sharurah gjithashtu janë parandaluar”, thuhet tutje në njoftimin e Ministrisë.