Ndeshje e çmendur, Barcelona fiton Sevillan me 5-4 dhe merr Super kupën

Në të vërtetë u deshën shtesat dy herë nga 15 minuta pasi në 90 minuta rezultati ishte i barabartë 4-4. Skuadra e Luis Enriques ishte duke fituar me rezultat 4-1 deri 20 minuta para se të përfundonte koha e rregullt, por Sevilla arriti të barazonte në 4-4 nëntë minuta para përfundimit.

Në minutën e 115, Pedro shënon golin e pestë dhe të fitores për Barçën, duke i dhënë një tjetër trofe katalanasve.

Të parët në epërsi kaluan Sevilla, në minutën e 3 me Banegan, ndërsa Messi me në të 7-n dhe 16-n përmbysi rezultatin përmes dy gjuajtjeve të lira.

Para përfundimit të pjesës së parë, Barça shënoi edhe golin e tretë me Rafinhan. Me të filluar pjesa e dytë, Luis Suarez shënoi golin e katërt.

Askush nuk e besonte se Sevilla deri në fund do të barazonte. Por, Reyes, Gameiro dhe Konoplyanka refuzuan të dorëzoheshin duke arritur barazimin në 90 minuta.

Pas kësaj, u shkua në lojën shtesë, ku ishte Pedro, në minutën e 115-të, ai që priti më së miri një top të kthyer pas gjuajtjes së Messit, duke ia sjellur kështu Barcelonës trofeun e pestë të Super Kupës, me çka ka barazuar rekordin e Milanit.

Deri në fund të ndeshjes, Sevilla pati edhe dy mundësi të shkëlqyeshme për të barazuar, tani në 5-5, por Konoplyanka dhe Rami nuk ia dolën të mposhtin edhe njëherë Ter Stegenin.