Është bllokuar lëshimi nga burgu i Oskar Pistoriusit

 

Vendimi për atë, se sa gjatë Pistorius do të qëndrojë në burg në Pretoria, tani i është lënë trupit special për lëshim të kushtëzuar në liri.

 

Pistorius vitin e kaluar u dënua me pesë vjet burg, për vrasje të paqëllimshme të së dashurës së tij Reva Stenkamp.

 

Vrasja ndodhi në shkurt të vitit 2013, në vilën e tij në Pretoria, kur Pistorius ka shtënë katër herë nga arma e tij, nëpër derën e mbyllur të banjës, duke menduar se aty gjendej një hajdut, pa e ditur se aty në ndërkohë ka hyrë Stenkamp.

 

Prokuroria nuk e pranonte versionin e këtillë të ngjarjes tragjike dhe e akuzoi Pistoriusin se me qëllim e ka vrarë të dashurën e tij pas një grindjeje të zhurmshme, por gjykatësi në proces konkludoi se nuk ka dëshmi për vrasje të qëllimshme dhe e dënoi për vrasje të paqëllimshme.

 

Sipas ligjeve jugoafrikane, që një i dënuar të mund të lëshohet në liri me kusht, duhet të kalojë një të gjashtën e dënimit që i është shqiptuar. Pistorius në burg gjendet dhjetë muaj.

 

Prokuroria shtetërore njoftoi se do të parashtrojë ankesë ndaj aktvendimit, që duhet të shqyrtohet në nëntor./mia