105 vjetori i lindjes së Nënë Terezës, tribunë shkencore në ITKSh

Me rastin e 105 vjetorit të lindjes në Shkup të njërës nga personalitetet më të mëdha botërore, figurës universale, Gonxhe Bojaxhiu–Nënë Terezë, Instituti i  Trashëgimisë Shpirtërore e Kulturore të Shqiptarëve në Shkup mbajti tribunë kushtuar figurës së saj.

 

Drejtori i Institutit, dr. Skender Hasani, vuri theks se duhet të ndriçohet periudha e rinisë së Nënës Terezë jo vetëm jeta, por edhe veprimtaria e saj përpara largimit të saj nga Shkupi.

 

“Neve si institut na mbetet që kjo periudhë e rinisë së Nënë Terezës ta hulumtojmë dhe ta nxjerrim në pah gjithë veprimtarinë e saj në rini, e cila periudhë është shumë pak ose aspak e hulumtuar dhe shumë pak është shkruar për këtë periudhë të jetës së saj”- deklaroi drejtori i ITKSh-së, Skender Hasani.  

 

“Ajo dëshmoi fuqinë e miqësisë vëllazërore duke nxitur kështu zhvillimin   njerëzor dhe shoqëror. Jeta e saj ishte një kushtrim jetësor ndaj të sëmurëve dhe të varfërve. Me gjak jam shqiptare, për nënshtetësi indiane, ndërsa besimi  murgeshë katolike, sipas thirrjes i përkas botës, por zemra ime i përket zemrës së Krishtit, janë këto fjalët e gruas që gjithmonë ndihmoi  njerëzit nevojtarë, por kurrë nuk harroi origjinën e saj shqiptare”- tha prof. dr. Nebi Dervishi.

 

“Shkupjanët krenohen ngaqë ajo ishte e lindur në Shkup, kosovarët ngaqë prindërit i kishte me prejardhje kosovare, ndërsa shqiptarët ngaqë ajo është shqiptare, kurse botës i vlen veprimtaria e saj”- u shpreh ambasadori i Republikës së Kosovës në Maqedoni, Ylber Hysa.

 

Ndërkohë, Don Viktor Sopi prezantoi një përmbledhje të burrështetasve botërorë për atë se si ata e vlerësuan figurën e saj. 

 

 

Ndryshe, Instituti i Trashëgimisë Shpirtërore dhe Kulturore të Shqiptarëve vazhdimisht ka afirmuar vlerat universale që ka Nënë Tereza.