Prokurori special, Zaev optimist se do të zgjidhet brenda afatit

21 ankesa do të parashtrohen kundër vendimit të Gjykatës Themelore Shkupi 1 për të hedhur poshtë si dëshmi bisedat e përgjuara telefonike në padinë kundër kryeministrit, Nikolla Gruevski, dhe bashkëpunëtorëve të tij.

 

Kreu i LSDM-së, Zoran Zaev, thotë se ky hap është  një sinjal shumë i mirë në procesin për kthimin e sundimit të së drejtës dhe pavarësisë së pushtetit gjyqësor.

 

 

Për sa i përket prokurorit special, lideri i LSDM-së thotë se nuk pret ndonjë pengesë në emërtimin e tij deri më 15 shtator. Nëse ky afat nuk respektohet, Zaev sërish kërcënon se do vazhdojë me publikimin e materialeve të përgjuara.

 

“Dallimet e ekipeve në bisedime janë konceptuale, por shpresoj se do të tejkalohen deri në fillim të javës që vjen. Mund të jetë data 7 apo 9, unë do isha i lumtur që të jetë i shtati, që me vendim ligjor përmes ndryshimit dhe plotësimit të ligjit, të zgjidhet prokuror special me një strukturë të re të formuar me disa zëvendësprokurorë, me shërbimet adekuate administrative dhe më e rëndësishmja me autonomi dhe pavarësi të plotë, pra gjithçka që do garantojë nisjen e procesit”- tha kryetari i LSDM-së, Zoran Zaev.

 

Por, edhe këtë herë Zaev nuk bëri të ditur se kur do t’i publikojë përgjimet që ai thotë se ka për rastin “Monstra”.

 

“Qëndrimi ynë tashmë është i qartë se nëpërmjet prokurorit special do të dorëzohen të gjitha materialet në mënyrë transparente dhe më pas do të publikohen me qëllimin për sjelljen e një vendimi të drejtë gjyqësor dhe këtu e vërteta do të ndahet me të gjithë qytetarët”- ka deklaruar Zaev gjatë vizitës së tij në Tetovë.