Grupet e punës takohen për prokurorin special, Zaev sot në gjykatë për rastin “Puç”

Prokurori special është tema që nuk po arrihet të kapërcehet me marrëveshje për shkak të qëndrimeve diametralisht të kundërta të grupeve të VMRO-së dhe LSDM-së. As të shtunën nuk u arrit marrëveshje për prokurorin special edhe përkundër optimizmit javës që shkoi të liderit të LSDM-së se kjo pikë do të përmbyllet shumë shpejt.

LSDM këmbëngul për një prokuror  special me autonomi të plotë, ndërsa VMRO-DPMNE prokuror me ndihmës, por që do të financohet dhe do të shfrytëzojë resurset njerëzore të prokurorisë publike. LSDM insiston në një zgjidhje ligjore për formimin e një departamenti special në gjykatë me shembullin e pjesës për lëndët e krimit të organizuar.

Nga VMRO-DPMNE po insistojnë që këto lëndë të punohen në departamentet që janë formuar në Gjykatën Penale.

Sot, ndërkohë, vazhdon edhe gjykimi në rastin “Puç”, ku i dyshuari kryesor është vetë lideri i LSDM-së, Zoran Zaev. Sipas praktikës së deritanishme, ai nuk do të paraqitet në gjykatë pasi nuk ka besim tek sistemi aktual gjyqësor. Avokatët e tij thonë se gjykimi për rastin e “Puç” do të shtyhet përderisa nuk zgjidhet prokurori special dhe nuk e merr në dorë lëndën në të cilën Zaev është i akuzuar për dhunë ndaj organeve më të larta shtetërore.