BE miraton sistemimin e 40 mijë azilkërkuesve, nuk fitojnë status refugjati azilkërkuesit nga Ballkani

Disa shtete anëtare, veçanërisht të bllokut lindor, mbajtën të njëjtin qëndrim kundër kuotave për të lehtësuar Italinë, Greqinë, Gjermaninë dhe Hungarinë, të cilat janë duke mbajtur barrën e valës së emigrimit të Evropës.

 

Por, ajo që ministrat zyrtarisht miratuan fillimisht është sistemimi i 40.000 azilkërkuesve që ndodhen në Itali dhe Greqi.

 

Gjithashtu u ra dakord për krijimin e një liste të përbashkët të BE-së për vendet e sigurta të origjinës, e cila tani për tani përfshin vetëm vendet e Ballkanit Perëndimor.

 

Azilkërkuesit nga këto vende nuk do të fitojnë status refugjati. Lista do të ketë nevojë për aprovimin e Parlamentit Evropian dhe kështu miratimi i tij zyrtar nuk ka gjasa të ndodhë para tetorit.

 

“Sot kemi arritur një marrëveshje politike. Është një hap i parë i rëndësishëm, por është ende larg nga ajo që ne presim në kuptimin e plotë të solidaritetit në Evropë. Një tjetër vendim përfundimtar pritet në takimin e ministrave të Brendshëm më 8 tetor”- deklaroi ministri i Brendshëm i Gjermanisë, Thomas De Maiziere.

 

Rëndësi të madhe për ministrin e Brendshëm gjerman ka fakti i regjistrimit të refugjatëve me shenja gishtërinjsh në pikat ku ata hyjnë në Evropë, e ndërsa atyre që i është mohuar azili do të rikthehen në vendet e origjinës shumë shpejt.

 

Edhe misionet detare të shpëtimit do të shtohen, me qëllim shpëtimin e emigrantëve në det dhe pengimin e trafikantëve, të cilët tentojnë për të transportuar njerëz drejt brigjeve evropiane.

 

Situata e refugjatëve mbetet e tensionuar, pasi ata enden të paorientuar.

 

Gjermania, destinacioni i pjesës dërmuese të refugjatëve që vazhdojnë të mbërrijnë në Hungari nga Serbia, vendosi një ditë më parë mbylljen e përkohshme të kufirit me Austrinë.

 

Po ashtu edhe Budapesti së bashku me Vjenën vendosën të dislokojnë trupa ushtarake për menaxhimin e fluksit të madh të refugjatëve që kanë vërshuar në këto vende.