Eurobasket: Franca – Spanja, “El Klasiko” e basketbollit europian
Franca dhe Spanja do të luajnë sonte edhe një ndeshje tjetër mes vete, për plasman në finalen e Kampionatit Europian, në një “El Klasiko” të re të basketbollit në Kontinentin e Vjetër...
Në Kampionatin e fundit Botëror që u zhvillua në Spanjë, në fazën grupore, “furia e kuqe” ishte ajo që ngadhnjëu, por më pas, në çerekfinale, trekolorët u revanshuan, duke eliminuar organizatorin. Ishte ky epilogu I njejtë si edhe një vit më parë, në Kampionatin Europian që u zhvillua në Slloveni.
Më parë, tre fitoret e fundit I kishin takuar spanjollëve, që patën triumfuar në çerekfinalen e Europianit në Poloni, në finalen e Europianit në Lituani si dhe në çerekfinalen e Lojërave Olimpike në Londër.
Por, tani situata është pak më ndryshe, pasi Franca llogaritet si favorit dhe mbi të gjitha është nikoqir, ndërsa Spanja nuk është aq e sigurt si më parë.
Një gjë është e sigurtë, kush do të ketë më shumë lojtarë të disponuar, në fund edhe do ti gëzohet fitores dhe plasmanit në finale. Gjysëmfinalja tjetër e Kampionatit Europian, në program është nesër mbrëma, kur do të takohen Serbia dhe Lituania.
MUSTAFA ADEMI