Kuvendi i Kosovës, opozita gjuan me vezë kryeministrin Mustafa

Mustafa ka filluar të raportojë, por nuk u lejua nga opozita, duke gjuajtur me vezë, pas çka u tensionua situata dhe Mustafa u largua nga salla e kuvendit, ndërsa kryeparlamentari, Kadri Veseli, ndërpreu seancën.

 

Madje, kryeparlamentari Veseli u desh të ndërhyjë edhe për të qetësuar deputetët, duke kërkuar largimin e tyre nga salla kuvendore.

 

Krahas mospajtimit me marrëveshjen me Serbinë, opozita ia bëri të madhe kryeministrit Mustafa edhe për mosraportimin në seancën e kaluar, por Mustafa tha se anulimi i raportimit javën e kaluar u bë pasi që ka dashur të jenë prezent edhe ministrat që kanë qenë pjesë e këtyre marrëveshjeve.

 

Po ashtu, Mustafa tha se kjo pako është në pajtim me kushtetutën dhe ligjet e Kosovës. Por, opozita nuk ndan mendimin e njëjtë. 

 

Lëvizja Vetëvendosje nëpërmjet një komunikate ka thënë se sot deputetët e opozitës ia ndalën gënjeshtrën Isa Mustafës, përmes së cilës ai synonte që edhe njëherë t'i gënjejë qytetarët dhe deputetët për marrëveshjet e Brukselit.

 

“Isa Mustafa sërish po i trajton deputetët dhe qytetarët si të padijshëm. Veprimet e tij janë tallje dhe shpërfillje e kuvendit, ashtu siç marrëveshjet e Brukselit janë rrënim i republikës”- vlerëson Vetëvendosje.

 

Por, shefi i grupit parlamentar të PDK-së, Adem Grabovci, veprimin e sotëm të opozitës e quajti jodemokratike dhe ftoi ata që të jenë më konstruktiv dhe të luajnë rolin që i takon opozitës.

 

Edhe deputetja e Lidhjes Demokratike të Kosovës (LDK), Alma Lama, ka thënë se sjelljet e opozitës janë të papranueshme dhe se sipas saj këto lloj sjelljesh nuk e shpëtojnë Kosovën nga asnjë lloj marrëveshje.