ShBA, Papa për emigrantet: Mos shikoni numrin, dëgjoni historitë e tyre

Heqje të dënimit me vdekje, më shumë solidaritet me emigrantët, por edhe temat e tjera që shqetësojnë sot botën ishin në qendër të fjalimit të të Atit të Shenjtë.

 

Kreu i Vatikanit e nisi fjalën me një nga shprehjet më simbolike amerikane: “Jam mirënjohës që jam këtu në tokën e të lirëve dhe në atdheun e trimave”.

 

Ati i Shenjtë dha një mesazh për krizën e emigrantëve, duke e lidhur edhe me historinë e tij personale: “Të gjithë ne kemi qenë dikur të huaj diku. E them këtë si bir emigrantësh. Ne nuk duhet të trembemi nga numri i tyre, por t’i shohim si njerëz, duke vështruar fytyrat e tyre dhe duke dëgjuar historitë e tyre. Trajtoi të tjerët ashtu siç do doje të të trajtonin ata ty”.

 

Në fjalën e tij, Papa Françesku bëri thirrje që t’i jepet fund dënimit me vdekje në ShBA dhe në botë, ndërsa nënvizoi rëndësinë e një “ekuilibri delikat” në luftën kundër ekstremizmit fetar, duke u shprehur se asnjë fe “nuk është e imunizuar nga format e keqkuptimit individual ose nga ekstremizmi ideologjik”.

 

Bota, tha Papa, nuk duhet ndarë në dy kampe: e mira dhe e keqja. 

 

Është hera e parë që një Papë flet në një kongres amerikan dhe fjalimi ishte një ndër vetëm katër gjatë vizitës që ai do mbajë në anglisht, pasi të tjerët do i mbajë në gjuhën e tij spanjolle.

 

Pas fjalimit që u përshëndet me duartrokitje të gjata, Papa foli edhe para të gjithë admiruesve të mbledhur para Kapitolit, duke i përshëndetur dhe bekuar.