Hollande: Kemi shkatërruar një kamp trajnimi të IS-it

Presidenti i Francës, Francois Hollande, ka thënë se gjashtë avionë francezë kanë goditur një kamp trajnimi të militantëve të Shtetit Islamik në Siri, duke shkatërruar objektivat e tyre.

 

“Franca ka goditur këtë mëngjes një kamp trajnimi të Shtetit Islamik në Siri, i cili ka kërcënuar sigurinë e vendit tonë”, u ka thënë Hollande gazetarëve në Kombet e Bashkuara.

 

Kampi i militantëve ka qenë pranë provincës Deir al-Zor.

 

Hollande ka paralajmëruar sulme të tjera në javët e ardhshme.

 

Këto janë sulmet e para ajrore të Francës kundër militantëve të Shtetit Islamik në Siri.

 

Avionët francezë kanë kryer më parë sulme ajrore vetëm kundër objektivave të Shtetit Islamik në Irak./evropaelire