Bankës Botërore: Maqedonia, e dyta në rajon me rritje ekonomike

Raporti i Bankës Botërore për Maqedoninë parashikon rritje për 3.2%, që në krahasim me vitin 2014 është një vlerësim më i ulët, i cili është bazuar në krizën politike të vendit, por megjithatë shifrat e 3.2% janë mjaft solide dhe e rangojnë Maqedoninë në vendin e dytë në rajon me rritje ekonomike më të madhe.  

 

“Zhvillimi ekonomik në vend kryesisht është i mbështetur nga ndërtimtaria, tregtia, si dhe shërbimet financiare. Këtë herë industria ka një kontribut të vogël me faktin se prodhimi industrial në gjysmëvjetorin e parë ishte thuajse 0, ndërsa disa muaj edhe negativ”- deklaroi ekonomisti i Bankës Botërore, Bojan Shimbov.

 

Papunësia është ulur, por gjithsesi shqetësuese mbetet përqindja e  papunësisë së të rinjve, ku Maqedonia është në mesin e shteteve me papunësi të të rinjve më të lartë në Evropë, thuhet në raport.

 

Gjithashtu, sipas raportit të Bankës Botërore, një faktor tjetër shqetësues është edhe borxhi publik i cili prej vitit 2008 është dyfishuar, ndërsa pritet të ketë trend rritës edhe në të ardhmen.

 

Drejtori i Bankës Botërore vlerëson se shteti duhet të ketë kujdes se ku i harxhon mjetet e huazuara. 

 

 

Nga ana tjetër, ekonomistët e Bankës Botërore vlerësojnë se kriza politike dhe kriza me emigrantët janë rreziqet me të cilat duhet të ballafaqohet Maqedonia, respektivisht vendet tjera të rajonit.