Botë
Obama, sulmet ruse në siri ‘kundër-produktive’
03.10.2015 14:59
Presidenti i Shteteve të Bashkuara, Barak Obama, i ka hedhur poshtë pikëpamjet e Rusisë për krizën katërvjeçare në Siri...
Presidenti i Shteteve të Bashkuara, Barak Obama, i ka hedhur poshtë pikëpamjet e Rusisë për krizën katërvjeçare në Siri, duke thënë se jo të gjithë njerëzit, që e kundërshtojnë regjimin e presidentit të Sirisë, Bashar al-Assad, janë terroristë, siç konsideron Rusia.
Më tutje, Obama, theksoi se qasja e Moskës në Siri është “recetë për shkatërrim”.
Ai ka vlerësuar se sulmet ajrore të Rusisë në Siri janë kundër-produktive.
“Llojet e sulmeve ajrore kundër opozitës së moderuar në Siri, në të cilat Rusia është e angazhuar, do të na lëvizin më larg nga zgjidhja përfundimtare, të cilën të gjithë ne duhet ta kërkojmë”, tha Barak Obama, dhe ka shtuar se fokusi duhet të jetë në sulmet kundër ekstremistëve të Shtetit Islamik dhe të al-Kaidës.
Presidenti amerikan ka pranuar se programi për trajnimin dhe pajisjen e forcave të opozitës së moderuar në Siri nuk ka funksionuar, ashtu siç ishte menduar.
Ai theksoi se Shtetet e Bashkuara po punojnë me Turqinë që të ndihmoj në sigurimin e kufirit të saj jugor me Sirinë dhe për përpjekjet për t’i mbështetur luftëtarët kurdë në pjesën lindore të Sirisë.