BDI dhe VMRO-DPMNE, Shilegov: Gruevski pranoi se "bombat" janë autentike; Dimovski: Zaev dha fjalë për një ligj të tillë

Kjo zgjidhje ligjore është dakorduar nga liderët e partive politike në prani të zyrtarëve të huaj, gjegjësisht në momentin kur është arritur marrëveshje për Ligjin për prokuror special, tha koordinatori i BDI-së, Talat Xhaferi.

 

Me këtë Ligj mediat obligohen të largojnë nga ueb-faqet e tyre të gjitha materialet që kanë të bëjnë me materialet e përgjuara. 

 

 

Pas njoftimit të BDI-së, në Kuvend LSDM dhe VMRO-DPMNE shprehën reagimin e tyre ndaj Ligjit për moratoriumin mbi materialet e përgjuara.

 

Sipas Peter Shilegovit, kjo nuk është pjesë e marrëveshjes politike dhe nënshkruesit as që kanë diskutuar për një ligj të tillë, por me dorëzimin e këtij propozim-ligji pranojnë se "bombat" janë autentike. 

 

Ndërsa sipas Ilija Dimovskit, lideri i LSDM-së ka dhënë fjalë për ligj që ndalon publikimin e materialeve të përgjuara. 

 

"Dorëzimi i propozim-ligjit nga VMRO-DPMNE dhe BDI dhe materialet që sipas Nikolla Gruevski janë të montuara, papritmas i bënë materiale të përgjuara që me ligj duhet të ndalohen. Nuk ka njohje më të madhe publike nga VMRO-DPMNE dhe BDI për autenticitetin e përmbajtjes skandaloze të materialeve. Me këtë veprim dëshmojnë se frikohen nga materialet”- theksoi Petre Shilegov nga LSDM.

 

"Çdo përpjekje  e LSDM-së për të demantuar kryetarin e tyre është çështje e tyre e brendshme. Por, obligimi është ndërmarrë nga lideri i LSDM-së dhe ne besojmë se duhet të respektohet. Janë të pavërteta akuzat se dikush është i frikësuar apo ik nga këto materiale. Qëllimi është për të ndaluar keqpërdorimin e tyre, për mbrojtjen e rendit juridik dhe për të mbrojtur qytetarët që mund të jenë të shantazhuar, ose të detyrohen që të jenë nën kërcënim. Qëllimi është të mbrohen të drejtat e njeriut”- u shpreh Ilija Dimovski nga VMRO-DPMNE.

 

Deri tani nuk ka asnjë informacion kur Ligji do të jetë në seancë parlamentare.