Kosovë, paralajmërohet arrestimi i Albin Kurtit, ndërkombëtarët kundër gazit lotsjellës në Kuvend

Pas seancës së djeshme të Kuvendit të Kosovës, ku opozita përdori gaz lotsjellës për të ndërprerë seancën, kryetari i Vetëvendosjes, Visar Ymeri, ai i NISMA për Kosovën, Fatmir Limaj, dhe i AAK-së, Ramush Haradinaj, janë takuar në një takim me dyer të mbyllura për media për të ndërtuar strategjinë e veprimit të mëtejmë të opozitës. 

 

Ndërkohë, mediat në Prishtinë paralajmërojnë se Policia e Kosovës pritet ta arrestojë deputetin e VV-së, Albin Kurtin, për shkak të hedhjes së gazit lotsjellës në Kuvend.

 

Bllokimi i punës së Kuvendit të Kosovës dhe veprimet e djeshmeve të deputetëve të opozitës kanë qenë temë e diskutimeve në takimin e presidentes së Kosovës, Atifete Jahjaga, dhe kryetarit të Kuvendit, Kadri Veselit.

 

Në këtë takim, siç është bërë e ditur nga presidenca Jahjaga, ajo shprehu shqetësimin e saj për veprimet e dhunshme në seancën e djeshme të Kuvendit të Kosovës dhe pengimin e procesit demokratik. Kryeparlamentari Veseli ka takuar edhe ambasadorët e ShBA-së, Britanisë së Madhe, Gjermanisë, Francës, Italisë, si dhe përfaqësuesit e BE-së në Kosovë.

 

Ambasadorët me këtë rast shprehën shqetësimin e vendeve të tyre për situatën e krijuar në Kuvendin e Kosovës.

 

Ata i dhanë mbështetje të plotë kryetarit Veseli dhe e përgëzuan për lidershipin e vendosur demokratik të treguar në drejtimin e Kuvendit në situatën aktuale.

 

Ambasadorët theksuan se për vendet e tyre janë të papranueshme veprimet që cenojnë parimet dhe vlerat e demokracisë, mbi të cilat janë ndërtuar dhe funksionojnë institucionet e Kosovës.

 

Ndërsa Veseli theksoi nevojën për një angazhim më proaktiv të të gjithëve brenda këtij partneriteti, në mënyrë që Kosova të ecë përpara dhe skenarët e destabilizimit e të kthimit prapa të mos kenë rast të jetësohen.