Rriten gjasat për mbylljen e pakos zgjedhore

 

VMRO-DPMNE këmbëngul që në diasporë të zgjidhen së paku tre deputetë, ndërsa LSDM thotë se nuk do të lejojë që VMRO të keqpërdorë ndikimin që ka mbi ambasadat dhe konsullatat e vendit për të siguruar edhe një herë tre deputetë për vete. Opozita maqedonase këmbëngul në barazinë e votës. 

 

Nisur nga përvoja e deritanishme, partitë shqiptare janë kundër votimit në diasporë. Partitë shqiptare propozojnë që diaspora të votojë për lista në njësitë përkatëse në Maqedoni.  

 

Qëndrimet e partive politike në bisedime i deklaroi vetë kreu i VMRO-DPMNE-së, njëkohësisht edhe kryeministër, Nikolla Gruevski, në një intervistë në TV Sitel.  

 

Palët janë dakorduar që KShZ-së t’i jepen më shumë kompetenca, por VMRO-DPMNE ka kundërshtuar kërkesën e BDI-së që KShZ të marrë vendime sipas parimit të Badenterit.

 

Ndërkaq, LSDM do të pranonte këtë kërkesë nëse BDI paraprakisht dakordohej me VMRO-DPMMNE-në për këtë çështje. 

 

Sipas Gruevskit, kërkesa e BDI-së është e paarsyeshme dhe e paargumentuar, pasi mund të bllokojë procesin zgjedhor në rreth 60% të territorit. 

 

Për ankesat në shkallë të dytë edhe më tej do të vendos Gjykata Administrative, por me mbikëqyrje të shtuar. 

 

Burime nga tryeza e bisedimeve njoftojnë se është rënë dakord edhe për pastrimin e Listës Zgjedhore, e cila duhet të bëhet me kryqëzimin e bazave të të dhënave nga më shumë institucione dhe konstatimin e gjendjes në terren.

 

Nëse pakoja zgjedhore mbyllet në takimin e sotëm të Grupit punues, të martën duhet të fillojë procedura për shndërrimin e marrëveshjes në ligje.