Austri, në 36 orët e fundit arritën mijëra emigrantë

Gjithsej 12,220 emigrantë kanë hyrë në pjesën lindore të Austrisë gjatë 36 orëve të fundit, derisa po vazhdon depërtimi i emigrantëve nga Lindja e Mesme nëpër vendet e Ballkanit për në shtetet e Bashkimit Evropian, ka thënë sot policia.

Sipas policisë, të dielën, 8,540 persona kanë hyrë nëpër vendkalimin kufitar Nickelsdorf me Hungarinë, ndërsa deri në mëngjesin e sotëm kanë hyrë edhe 3,680 emigrantë të tjerë.

Zëdhënësi i Policisë së Austrisë, Gerald Koller, i ka thënë agjencisë AFP se rritja aktuale e numrit të emigrantëve pas disa ditëve më të qeta ka ndodhur për shkak të shtimit të numrit të hyrjes së këtyre njerëzve nga Greqia në Maqedoni.

Ata synojnë vazhdimin e rrugës për në Serbi, Kroaci dhe Hungari. Nga ana tjetër, Policia hungareze tha se 7,879 njerëz kanë hyrë në këtë vend ditën e diel, ndërsa të shtunën në Hungari kanë hyrë 7,907 emigrantë.

Ky është fluksi më i madh i emigrantëve në Evropë, gjatë së cilit disa qindra mijëra njerëz kanë hyrë në kontinent këtë vit, shumica prej tyre duke u larguar nga konfliktet në Siri, Irak dhe Afganistan.