Grupet e punës, VMRO nuk pranon propozimet e Vanhauttes

Mbrëmë ndërmjetësi ndërkombëtar, Piter Vanhautte, pasi ka vënë në tavolinë propozimet e tij për Kodin Zgjedhor, që kanë dalë kryesisht nga propozimet e partive në bisedime, përfaqësuesit e VMRO-DPMNE-së kanë kërkuar pauzë për konsultime brenda-partiake, por pas pritjes së gjatë, deri në orën 2:30 të mëngjesit, pjesëmarrësit janë detyruan ta anulojnë takimin.

 

Bisedimet vazhdojnë edhe sot, por pengesë kryesore mbetet votimi i diasporës. Mësohet se, propozimi i Vanhauttit ka përfshirë dy mundësi: vendosjen e pragut për kalimin e deputetëve të diasporës, ose që mërgata të votojë për mandatet brenda vendit. Por, të dyja kanë qenë të papranueshme për VMRO-DPMNE-në.

 

Çështje tjetër është kufizimi i harxhimeve për fushatën zgjedhore. Ligji aktual parashikon që partitë mund të shpenzojnë më së shumti 180 denarë për një votues të regjistruar, ndërsa LSDM-ja kërkon uljen e pragut për më shumë se gjysma.

 

Ky propozim është refuzuar ashpër nga VMRO-DPMNE, edhe pse të dhënat nga zgjedhjet e fundit tregojnë se partia e Gruevskit ka shpenzuar shumë më pak se maksimumi i lejuar.

 

Mosarritja e marrëveshjes për Kodin Zgjedhor ka shqetësuar komisionerin për zgjerim, Johanes Han. Zëdhënësja e Komisionit Evropian, Maja Kocijançiç, ka thënë se Han është seriozisht i shqetësuar nga pasuksesi i katër partive kryesore politike në Maqedoni dhe se me atë që janë kapërcyer të gjitha afatet për implementimin e marrëveshjes politike nga dy qershori dhe pesëmbëdhjetë korriku.

 

 

Sipas Kocijançiç, Brukseli pret që “vullneti politik duhet përkthyer në marrëveshje për çështjet e hapura, me kompromis nga të gjitha anët dhe në interesin e vendit”.

 

“Komisari Han shpreson në përkushtimin për implementimin e tërësishëm të marrëveshjes politike nga ana e katër partive politike, do të mundësojë finalizimin e marrëveshjes për të gjitha këto çështje në afat më të shkurtër, pasi që koha po ecë”- thotë Kocijançiç.