Kriza politike, raportuesi i PE-së për RM-në për vizitë zyrtare në Shkup

Raportuesi për Maqedoninë në Parlamentin Evropian, Ivo Vajgëll, gjate ditës së sotme do të qëndrojë në Shkup për të vlerësuar rrjedhën e punimeve të grupeve punuese dhe se si po realizohet Marrëveshja e Përzhinës, marrëveshje kjo që paraqet  plan për dalje nga kriza, të cilës i dhanë dritë jeshile për implementim të katër partitë politike me nënshkrimin e Marrëveshjes në Përzhinë.

Raportuesi i Parlamentit Evropian, Ivo Vajgëll, ka qenë i pranishëm edhe gjatë raundit të parë të bisedimeve të Përzhinës në muajin qershor, i shoqëruar me eurodeputetin, Riçard Hovit.

Por, Vajgëll kësaj radhe nuk do të realizojë takim me grupet punuese të cilët po diskutojnë për të gjitha pikat e marrëveshjes së qershorit.

Ai do të realizojë takime të ndara me partitë politike dhe konkluzionet përfundimtare do t’i prezantojë në raportin e Maqedonisë në Parlamentin Evropian.