Nuland kërkon zgjidhjen e kontestit me emrin

Nuland ka kërkuar nga palët kontestuese që ta zgjidhin problemin me emrin, për të cilin ka siguruar edhe ndihmën amerikane në përafrimin e qëndrimeve mes Athinës dhe Shkupit. 

 

“Edhe me kryeministrin edhe me ministrin e Brendshëm biseduam për shpresat tona të përbashkëta, që të gjejmë zgjidhje e cila do të jetë e pranueshme nga palët, që të mundemi ta tejkalojmë këtë problem të vjetër në periudhën e ardhshme”- deklaroi ndihmëssekretarja e shtetit të ShBA-ve, Viktoria Nuland.

 

Sipas politikës greke, vizita e zyrtares amerikane nënkupton trysninë që ShBA-të po bëjnë ndaj Athinës për tejkalimin e çështjes, të cilët njëherit kanë theksuar se në periudhën e ardhshme do të shtohet forca diplomatike e ndërkombëtarëve për tejkalimin e kontestit shumëvjeçar. 

 

Edhe kryetari francez, Fransoa Oland, po qëndron sot dhe nesër në Greqi, ku sipas disa informacioneve, çështja e emrit do të jetë, mes tjerash, temë e bisedimeve e kryetarit francez me autoritetet greke. 

 

 

Në ndërkohë, edhe pse në skemën politike në vend çështja e emrit përballë sfidave aktuale është anashkaluar, gjithsesi paraqet një problem të ngrirë me fqinjin jugor.

 

Një ndër pikat e Marrëveshjes së Përzhinës konsiston në rregullimin e problemeve bilaterale të Maqedonisë me fqinjët.

 

Po ashtu çështja e emrit pritet të zërë vend të posaçëm në progres raportin për Maqedoninë në kapitullin e fqinjësisë së mirë dhe raporteve rajonale.