Ivanov: situata po komplikohet, fajtorë liderët

Presidenti, Gjorge Ivanov, ka ftuar liderët e katër partive politike, nënshkruese të Marrëveshjes së Përzhinës, që të zbatojnë dokumentin për të cilin janë dakorduar me ndërmjetësim të përfaqësuesve ndërkombëtarë.

 

Zbatimi i marrëveshjes politike të dy qershorit është obligim dhe përgjegjësi e katër liderëve politik, brenda afateve të dakorduara, thotë Ivanov. Sipas tij, vazhdimi i krizës politike po e përkeqëson gjendjen e përgjithshme në Maqedoni.  

 

“Për fat të keq, si po kalon koha dhe po tejkalohen afatet, por edhe si nuk plotësohen obligimet e marra, situata po komplikohet. Kriza në shtet po zgjat shumë. Secili duhet të jetë i përgjegjshëm dhe të mbajë përgjegjësinë e vet për atë që zgjidhjet po shtyhen. Bëj thirrje te të gjithë palët e përfshira në këtë proces që të veprojnë ashtu siç janë dakorduar”- deklaroi presidenti i RM-së, Gjorge Ivanov.

 

Sipas tij, qytetarët po humbin durimin edhe pse shquhen si durimtarë. Situata e tendosur ndikon drejtpërdrejt në biznesin dhe në jetët e njerëzve.

 

Pavarësisht thirrjeve nga autoritet vendore dhe ndërkombëtare për respektim të marrëveshjes dhe zhbllokimin e ngërçit politik, nga dje nuk është shënuar asnjë avancim në këtë drejtim.

 

Marrëveshja rrezikon të dështojë nëse brenda pak ditësh palët nuk mbyllin çështjet kyçe të domosdoshme për organizimin e zgjedhjeve korrekte dhe demokratike.

 

Një mundësi të tillë e paralajmëroi vetë ndërmjetësuesi belg, Piter Van Hojt.

 

Nëse marrëveshja dështon, BE mund të aplikojë metodat që ka aplikuar ndaj kreut të lartë shtetëror të Bjellorusisë, siç janë listat e zeza dhe bllokimi i xhirollogarive.