Kriza e refugjatëve, Ivanov: Kemi kapacitet vetëm për 2 mijë

Nëse vendet e BE-së vendosin të mbyllin korridorin e refugjatëve, do të duhet të merren masa për ngadalësimin e fluksit të tyre, sepse Maqedonia ka kapacitet që të përkujdeset për jo më shumë se 2 mijë  refugjatë dhe atë me ndihmën e UNHCR-së dhe të Kryqit të Kuq.

 

Këtë e potencoi presidenti, Gjorge Ivanov, në brifingun me gazetarët pas përfundimit të mini Samitit të dhjetë vendeve të BE-së me Maqedoninë, Serbinë dhe Shqipërinë.

 

“Aktualisht, edhe pse nuk ka ndihmë, Maqedonia arrin t’ia dalë, por mund të jetë vetëm vend transit në të cilin hyjnë e transitojnë dhe dalin emigrantët. Maqedonia nuk ka kapacitet të mbajë numër më të madh migrantësh në territorin e saj, nëse mbyllet korridori”- deklaroi kryetari i RM-së, Gjorge Ivanov.

 

Por, Ivanov ka thënë se Greqia nuk pranon që shërbimi kufitar evropian, Froteks, të vendoset në kufirin mes Greqisë dhe Maqedonisë, për të kontrolluar fluksin e refugjatëve.

 

Deri tani Maqedonia ka marrë vetëm 90 mijë euro mjete nga BE-ja, ndërsa brenda një muaji shpenzon rreth një milion euro vetëm për forcat e sigurisë. 

 

Ndryshe, në 24 orët e fundit në Maqedoni janë futur gjithsej 2 mijë e 973 shtetas të huaj.

 

Sipas shtetësisë, pjesa më e madhe, siç njofton MPB, janë shtetasit e Sirisë, 1 mijë e 942, nga Afganistanit 549, Iraku 273 dhe një numër më i vogël nga vende tjera.

 

Ndërsa në periudhën prej 19 qershorit e deri më 26 tetor të këtij viti, 178 mijë e 902 shtetas të huaj kanë transituar nëpër Maqedoni, pjesa më e madhe e të cilëve vijnë nga Siria, të cilët kanë pasur si destinacione përfundimtare vendet e BE-së.