Zbatimi i marrëveshjes, Pitela: Gruevski të finalizojë negociatat; Riçard Hovit: Përmbyllja e marrëveshjes, çështje orësh; Zaev: Nuk ka zgjidhje tjetër, marrëveshja duhet zbatuar

Ata besojnë se zbatimi i marrëveshjes është mënyra më e mirë për të dalë nga kriza dhe se përgjegjësinë për zbatimin e tij e bartin të gjitha palët. Pas takimit me liderin e LSDM-së, Zoran Zaev, dy deputetët e Parlamentit Evropian, Hovit dhe Pitela, thanë se zgjidhja e vetme është implementimi i marrëveshjes politike, si dhe apeluan deri te kryeministri, Nikolla Gruevski, që të mbyllë të gjitha çështjet e hapura të marrëveshjes.

“Marrëveshja kërkon nga partitë, pra nga të gjitha partitë në Maqedoni, që interesin e shtetit ta vendosin në vend të parë, të konfirmojnë angazhimin e tyre në integrimin euroatlantik të vendit, por edhe të konfirmojnë angazhimin e tyre për principet demokratike. Ne i bëjmë thirrje kryeministrit të finalizojë negociatat me një zgjidhje për çështjet e pazgjidhura dhe të zbatojë reformat e nevojshme që do të çonin në zgjedhje të drejta dhe demokratike. Qeveria dhe kryeministri janë në veçanti përgjegjës në kushtet e krizës politike”- deklaroi eurodeputeti, Xhani Pitela.

“Pajtohem me Xhani Pitelan, ku thotë se ne presim që Marrëveshja e dy qershorit të zbatohet në tërësi. Ndërsa sa i përket raportit për përparimin e vendit drejt BE-së, tani mund të themi se më nuk janë në pyetje ditët, por janë në pyetje orët kur bëhet fjalë për realizimin e marrëveshjes”- tha eurodeputeti, Riçard Hovit.

Kryetari i LSDM-së, Zoran Zaev, edhe njëherë përsëriti qëndrimin se zbatimi i tërësishëm i Marrëveshjes së Përzhinës është rruga e vetme e cila do të nxjerrë vendin nga kriza politike.

“Tek miqtë tanë dhe mbështetësit e sinqertë ekziston shqetësim serioz nga shkelja e të gjitha afateve të parapara me Marrëveshjen e dy qershorit dhe 15 korrikut nga ana e VMRO-DPMNE-së. Nuk ka zgjidhje tjetër, veç zbatimit të tërësishëm të marrëveshjes”- theksoi lideri i LSDM-së, Zoran Zaev.

Sipas eurodeputetit, Xhani Pitela, të gjitha partitë duhet me urgjencë të punojnë në realizimin sa më të shpejtë të marrëveshjes, pasi që implementimi i saj është thelbësor për raportet ndëretnike dhe stabilitetin e vendit. (Sanije Kasami, TVM2)